დონალდ ტრამპი - არ მინდა უსარგებლო შეხვედრა, არ მინდა დროის ფუჭად კარგვა
22.10.2025 ნახვები: 423
აშშ-ის პრეზიდენტის, დონალდ ტრამპის განცხადებით, ჯერ არ გადაუწყვეტია, შეხვდება თუ არა რუსეთის პრეზიდენტ ვლადიმერ პუტინს.
ტრამპმა ჟურნალისტებს განუცხადა, რომ, უსარგებლო შეხვედრის გამართვა არ სურს.
„არ მინდა უსარგებლო შეხვედრა. არ მინდა დროის ფუჭად კარგვა. ამიტომ, ვნახავ, რა მოხდება“, - განაცხადა აშშ-ის პრეზიდენტმა.
მისი თქმით, პუტინთან შეხვედრის შესახებ გადაწყვეტილებას მომდევნო ორი დღის განმავლობაში მიიღებს.
საინფორმაციო სააგენტო Reuters-ი თეთრი სახლის მაღალჩინოსანზე დაყრდნობით ავრცელებს ინფრმაციას, რომ აშშ-ის პრეზიდენტ დონალდ ტრამპსა და რუსეთის პრეზიდენტ ვლადიმერ პუტინს შორის “უახლოეს მომავალში“ შეხვედრა არ იგეგმება.
წყაროს ცნობით, ასევე არ არსებობს აშშ-ის სახელმწიფო მდივნის, მარკო რუბიოსა და რუსეთის საგარეო საქმეთა მინისტრის, სერგეი ლავროვის პერსონალურად შეხვედრის გეგმები.
ასევე, წყარომ 20 ოქტომბერს გამართული სატელეფონო საუბარი როგორც “პროდუქტიული” აღწერა.
ცნობისთვის, აქამდე აშშ-ის პრეზიდენტმა, დონალდ ტრამპმა ინფორმაცია გაავრცელა, რომ ის და რუსეთის პრეზიდენტი ვლადიმერ პუტინი ბუდაპეშტში შეხვედრას გეგმევენ, თუმცა თარიღები არ დაუსახელებია.
