WSJ“ - დონალდ ტრამპმა ვოლოდიმირ ზელენსკის უთხრა, რომ მზადაა, მოხსნას აკრძალვა ამერიკული იარაღით რუსეთის ტერიტორიის შიგნით დარტყმებზე

„უოლ სთრით ჯორნალის“ ცნობით, დონალდ ტრამპმა ვოლოდიმირ ზელენსკის უთხრა, რომ მზადაა, მოხსნას აკრძალვა ამერიკული იარაღით რუსეთის ტერიტორიის შიგნით დარტყმების განხორციელებაზე.

როგორც ამერიკული გამოცემა წერს, რომელიც ინფორმაციას მაღალი რანგის ამერიკელ ოფიციალურ პირზე და უკრაინის ხელისუფლების წყაროზე დაყრდნობით ავრცელებს, ამის შესახებ აშშ-ის პრეზიდენტმა დონალდ ტრამპმა უკრაინის პრეზიდენტ ვოლოდიმირ ზელენსკის გაერო-ს გენასამბლეის ფარგლებში გამართულ შეხვედრაზე უთხრა.

„უოლ სთრით ჯორნალის“ ცნობით, ზელენსკიმ ტრამპს სთხოვა, მეტი შორ მანძილზე მოქმედი რაკეტების მიწოდება და დაეშვა ამ იარაღის გამოყენება რუსეთის ტერიტორიაზე სამიზნეების წინააღმდეგ. ტრამპმა უპასუხა, რომ ამ იდეის წინააღმდეგი არ არის.

თუმცა, როგორც გამოცემის ორივე წყარო აღნიშნავს, აშშ-ის პრეზიდენტმა საუბრისას არ აიღო არანაირი ვალდებულება ამგვარი აკრძალვის მოხსნასთან დაკავშირებით.

გამოცემის ინფორმაციით, უკრაინის დელეგაცია მომავალ კვირაში ვაშინგტონში ჩავა, რათა შეხვედრა გამართოს პენტაგონის ხელმძღვანელ პიტ ჰეგსეთთან.

ცნობისთვის, მანამდე ზელენსკიმ „აქსიოსთან“ ინტერვიუში განაცხადა, რომ გაერო-ში გამართულ შეხვედრაზე ტრამპს სთხოვა კიევისთვის შორ მანძილზე მოქმედი იარაღის მიწოდება და, მისი თქმით, ტრამპმა უპასუხა, რომ აშშ „ამაზე იმუშავებს“. მოგვიანებით, გამოცემის წყაროებმა მიანიშნეს, რომ შესაძლოა, საუბარი იყოს „ტომაგავკის“ ტიპის ფრთოსან რაკეტებზე, რომელთა მოქმედების რადიუსი 2000 კმ-ზე მეტია.