ფრიდრიხ მერცი - ქვეყანამ ფაქტობრივად შეწყვიტა მშვიდობიან პირობებში ცხოვრება

გერმანიის კანცლერმა ფრიდრიხ მერცმა განაცხადა, რომ კრიტიკულ ინფრასტრუქტურასა და ქსელებზე ჰიბრიდული თავდასხმების რაოდენობის ზრდის გამო, ქვეყანამ ფაქტობრივად შეწყვიტა მშვიდობიან პირობებში ცხოვრება.

ამის შესახებ მერცმა ბერლინში ბიზნესის წარმომადგენლების წინაშე სიტყვით გამოსვლისას თქვა.

გერმანიის კანცლერის თქმით, მონაცემთა გადაცემის ქსელებსა და ინფრასტრუქტურაზე თავდასხმების მზარდი რაოდენობის გათვალისწინებით, გერმანიაში მშვიდობაზე საუბარი აღარ შეიძლება.

„ჩვენ ომს არ ვაწარმოებთ, მაგრამ მშვიდობაშიც არ ვცხოვრობთ,“ – განაცხადა მერცმა.

გერმანიის კანცლერმა დამნაშავეები არ დაასახელა, თუმცა ჩამოთვალა გერმანიის წინააღმდეგ განხორციელებული რიგი მტრული ქმედებები.

„დრონების ფრენები, ჯაშუშობა, მკვლელობა ტიერგარტენში (ზელიმხან ხანგოშვილის მკვლელობა ბერლინში), მასობრივი მუქარა საზოგადოების ცალკეული წარმომადგენლების მიმართ არა მხოლოდ გერმანიაში, არამედ ევროპის ბევრ სხვა ქვეყანაში. საბოტაჟის აქტები – ეს ხდება ყოველდღიურად. მონაცემთა დამუშავების ცენტრების პარალიზების მცდელობები. კიბერთავდასხმები,“ – განაცხადა მერცმა.

გერმანიის მთავრობის მეთაურმა აღნიშნა, რომ პრობლემები შეეხო არამხოლოდ გერმანიის სახელმწიფო სტრუქტურებს, არამედ ბიზნესსაც.

„ვვარაუდობ, რომ აქ, ამ დარბაზში, ალბათ ყოველ მეორე ადამიანს ერთხელ მაინც ჰქონია შემთხვევა, როცა მისი მონაცემთა გადაცემის ქსელები და ინფრასტრუქტურა თავდასხმის სამიზნე გახდა,“ – განაცხადა გერმანიის კანცლერმა.