გერმანიის ჩრდილოეთში რამდენიმე უპილოტო საფრენი აპარატი შენიშნეს

გერმანული მედიის ცნობით, 26 სექტემბერს ღამით რამდენიმე უპილოტო საფრენი აპარატი შენიშნეს გერმანიის ჩრდილოეთში, ფედერალური მიწა შლეზვიგ-ჰოლშტაინის ცაში.

ინციდენტის შესახებ განცხადება გააკეთა შლეზვიგ-ჰოლშტაინის მიწის შინაგან საქმეთა მინისტრმა, საბინე ზიუტერლინ-ვაკმა.

მინისტრმა არ დააზუსტა, სად და რა რაოდენობით დრონები იყო აღმოჩენილი.

მისივე თქმით, რეგიონის შინაგან საქმეთა სამინისტრო „ინტენსიურად მუშაობს” ფედერალურ ხელისუფლებასთან და ბუნდესვერთან.

შლეზვიგ-ჰოლშტაინის პოლიცია ასევე აძლიერებს დრონებისგან დაცვის ზომებს მეზობელ ფედერალურ მიწებთან კოორდინაციით.

გერმანული მედიის ცნობით, მთლიანობაში, 2025 წელს რეგიონში, რომელიც ზღვის სიახლოვეს მდებარეობს და დანიას ესაზღვრება, ათობით უცნობი დრონი შენიშნეს.

დანიის სამართალდამცველებმა დაადასტურეს, რომ დრონები არაერთხელ გამოჩნდნენ  ღამის საათებში აეროპორტებთან.

26 სექტემბრის ღამეს დრონები დაფიქსირდა დანიის ოლბორგის აეროპორტის თავზე, რის გამოც აეროპორტმა დროებით შეწყვიტა რეისების მიღება. წინა ღამეს უცნობი დრონები შენიშნეს ოლბორგის, ესბიერის და სიონერბორგის აეროპორტების რაიონებში, ასევე დანიის სამხედრო-საჰაერო ძალების კიდევ ერთ ბაზასთან, სკრიდსტრუპთან.

ამ ეტაპზე უცნობია, ვინ და საიდან გაუშვა ეს უპილოტოები.

ამასთან, 22 სექტემბრის საღამოს უცნობი დრონების გამო დროებით დაიხურა კოპენჰაგენის აეროპორტიც.

დანიის იუსტიციის მინისტრმა პეტერ ჰუმელგორმა განაცხადა, რომ ეს ჰიბრიდული შეტევა იყო, რომლის მიზანსაც „ევროპელთა დაშინება და დაყოფა წარმოადგენდა“.

დანიის თავდაცვის სამინისტრო დარწმუნებულია, რომ დრონები პროფესიონალებმა გაუშვეს.

ქვეყნის თავდაცვის მინისტრის, ტროელს ლუნდ პოულსენის თქმით, დრონები საფრთხეს არ წარმოადგენდნენ მშვიდობიანი მოქალაქეებისთვის, ამიტომ მათი ჩამოგდება არ მოხდა.