6 თვის წინ 160 ავტობუსი ჰყავდა თბილისს ჩამოყვანილი, რომლის შესყიდვაც 2023 წელს მოხდა, 2025 წლის მარტში 160-ვე ავტობუსი უკვე დედაქალაქში იყო და კახი კალაძემ ისინი შეინახა, იმისთვის, რომ სწორედ წინასაარჩევნოდ 2 კვირით ადრე პიარისთვის გამოეყენებინა,- ამის შესახებ პარტიების „ლელოსა“ და „გახარია საქართველოსთვის“ მერობის ერთობლივმა კანდიდატმა ირაკლი კუპრაძემ გამართულ ბრიფინგზე განაცხადა.
მისი თქმით, თბილისის მთავრობას და ზოგადად საქართველოს ხელისუფლებას არ აინტერესებს მოსახლეობის საჭიროებები და მხოლოდ და მხოლოდ პოლიტიკურ პიარზე ზრუნავს.
„კახი კალაძეს, თბილისის მთავრობას, „ანტიქართულ ოცნებას“ არ აინტერესებს თბილისის რეალური პრობლემები, არ აინტერესებს ის საცობები, რომლებიც ხელს უშლის თბილისში გადაადგილებას, ხელს უშლის გამონაბოლქვის პრობლემის მოგვარებას. 6 თვე იყო გაჩერებული ავტობუსები, რის გამოც გადაადგილება არ იყო შესაბამისად გამოსწორებული თბილისში და ეს არის კახი კალაძის პერსონალური პასუხისმგებლობა. ის ფიქრობს მხოლოდ და მხოლოდ პიარზე და არაფერზე სხვაზე. კალაძეს და „ანტიქართულ ოცნებას“ ეკისრება პასუხისმგებლობა, მათ შორის, 60 მილიონის ღირებულების მომსახურების სივრცის აშენებაზე, რაც დღემდე არ გაკეთებულა, რამდენჯერმე გადაიდო ამ 160 ავტობუსის ავტოსადგომის მშენებლობა, რაც დღემდე დაუსრულებელია. დღეს კალაძე და „ანტიქართული ოცნება“ დაკავებულია მხოლოდ და მხოლოდ კორუფციით და მხოლოდ და მხოლოდ პოლიტიკური პიარით, რაც არ შეესაბამება თბილისის მოსახლეობის ინტერესებს.“- განაცხადა კუპრაძემ.
