ზუსტად ვიცით რა ბრძოლაშიც ვართ, ამიტომ უკან დახევას არ ვაპირებთ - მოლოდინი მაქვს, რომ საპატიმრო სასჯელი იქნება, - ამის შესახებ „სტრატეგია აღმაშენებლის“ ლიდერმა გიორგი ვაშაძემ განაცხადა.
მისი შეფასებით, სასამართლოში მიმდინარე პროცესები აჩვენებს იმას, რომ დღეს „ქართული ოცნება" სუსტია.
„დაჩქარებული წესით აპირებენ, რომ დაამთავრონ სასამართლო პროცესი. ზუსტად ვიცით რა ბრძოლაშიც ვართ, ამიტომ უკან დახევას არ ვაპირებთ, გავიმარჯვებთ და გავიმარჯვებთ ახლო მომავალში. ეს პროცესები, რომლებიც სასამართლოში მიდის, ძალიან კარგად აჩვენებს თუ როგორი სუსტია რეჟიმი, აბა ძლიერი რომ იყოს პოლიტიკური ოპონენტებისა და ახალგაზრდების დაჭერას შეეცდებოდა? თუ მედიის გაჩუმებასა და საკანონმდებლო ბაზის გაუბედურებას? თუ პოლიციის ზურგს უკან დამალვას? არა, სუსტი რომ არის იმიტომ აკეთებს ამას. მთავარია, რომ ბრძოლა გავაგრძელოთ, მოლოდინი მაქვს, რომ საპატიმრო სასჯელი იქნება.
რატომ ეჩქარებათ? არ ვიცი, მოსამართლემ თავი გაიგიჟა, თან ეს მოსამართლე არის ადამიანი, რომელმაც ახალგაზრდა კაცი, ქართველი ადამიანი, რომელიც ახლა უნდა სწავლობდეს, ციხეში გაუშვა“, - განაცხადა გიორგი ვაშაძემ.
ინფორმაციისთვის, გიორგი ვაშაძე საქართველოს პარლამენტში შექმნილმა დროებითმა საგამოძიებო კომისიამ 15 აპრილს დაიბარა, თუმცა ვაშაძე სხდომაზე არ გამოცხადდა, რის შემდეგაც, მას ბრალი წაუყენეს.
გიორგი ვაშაძეს ბრალდება სისხლის სამართლის კოდექსის 349-ე მუხლით აქვს წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს, აღნიშნული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.
გიორგი ვაშაძეს აღკვეთის ღონისძიების სახით 50 000-ლარიანი გირაო აქვს შეფარდებული.
