ნანუკა ჟორჟოლიანი - მიჩივის მარიამ ლაშხი, “ფეისბუქზე” დაწერილი “სტატუსის” გამო
12.06.2025 ნახვები: 360
ტელეწამყვანი ნანუკა ჟორჟოლიანი სასამართლოში დაიბარეს. ამის შესახებ ჟორჟოლიანმა სოციალურ ქსელში დაწერა.
როგორც ტელეწამყვანი წერს, მას მარიამ ლაშხმა “ფეისბუქზე” დაწერილი პოსტის გამო უჩივლა, სადაც ჟორჟოლიანმა მას „მონა“ უწოდა.
ჟორჟოლიანის ინფორმაციით, პროცესი 12:00 საათზეა ჩანიშნული.
“ხვალ დამიბარეს სასამართლო პროცესზე. მიჩივის მარიამ ლაშხი, “ფეისბუქზე” დაწერილი სტატუსის გამო, სადაც მას მონა ვუწოდე. მონა ხარ მარიამ. რამდენჯერაც არ უნდა იჩივლო, ამას ვერაფერი შეცვლის.
მოსამართლეა ნინო ენუქიძე”, - წერს ჟორჟოლიანი.
მოგვიანებით, ნანუკა ჟორჟოლიანმა კიდევ ერთი "პოსტი" გამოაქვეყნა, რომელშიც წერს, რომ სასამართლოში დაბარებულები არიან ასევე, ტელეწამყვანები - ვახო სანაია და ვიკა ბუკია, ოპოზიციონერი პოლიტიკოსი - ელენე ხოშტარია და აქტივისტი - ანა სუბელიანი.
"სარჩელი დღეს შევიდა, პროცესები სასწრაფოდ ხვალვე დანიშნეს. რვის ნახევარზე დაგვირეკეს, როცა სასამართლო წესით აღარ უნდა მუშაობდეს.რატომ? ჩემი აზრით, ცდილობენ, მათე დევიძის ხვალინდელი სასამართლო გადაფარონ. ამიტომ, ხვალ მთელი დღე მთავარი თემა უნდა იყოს მათე! ხვალინდელი ფოკუსი უნდა იყოს მის პროცესზე", - წერს ჟორჟოლიანი.
