„ნაპოლიმ“, სადაც ხვიჩა კვარაცხელია თამაშობს, იტალიის ჩემპიონატში გიორგი კვერნაძის „ფროზინონეს“ უმასპინძლა – შეხვედრა ფრედ, 2:2 დაასრულა. საქართველოს ნაკრების თავდამსხმელი ნეაპოლელთა ძირითად შემადგენლობაში იყო, ხოლო გიორგი კვერნაძე სტუმართა განაცხადში მოხვდა, მაგრამ არ უთამაშია.
ხვიჩა კვარაცხელიამ პირველად მე-10 წუთზე სცადა გოლის გატანა, მაგრამ მის მიერ დარტყმული ბურთი მიზანს ასცდა. მე-13 წუთზე კვარაცხელამ მეკარესთან პირისპირ ვიქტორ ოსიმენი გაიყვანა – ნიგერიელმა თავდამსხმელმა მეკარეს ვერ აჯობა.
„ნაპოლი“ მე-16 წუთზე დაწინაურდა – მატეო პოლიტანოს დარტყმის შემდეგ „ფროზინონეს“ მეკარეს გუნდის გადარჩენის შანსი არ ჰქონდა. რამდენიმე წუთში კარში კვარაცხელიამ დაარტყა, მაგრამ ტურატიმ ამჯერად საიმედოდ ითამაშა. 30-ე წუთზე სტუმრებს ანგარიშის გათანაბრების რეალური შანსი ჰქონდა, თუმცა მატიას სოულის მიერ დარტყმული პენალტი მერეტიმ აიღო.
„ფროზინონემ“ ანგარიში მეორე ტაიმის დასაწყისში გაათანაბრა - სოულიმ ნეაპოლელთა მერეტის გადაცემა ჩაჭრა და ბურთი ვალიდ ხედირას გადააწოდა, რომელმაც წონასწორობა აღადგინა.
ამის შემდეგ ხვიჩამ სცადა გოლის გატანა, მაგრამ პირველ შემთხვევაში მისი დარტყმული კარს ოდნავ ასცდა, მეორედ კი „ფროზინონე“ მეკარემ გაადაარჩინა. 64-ე წუთზე კვარაცხელიამ საგოლე პასი მიითვალა – ქართველმა ფეხბურთელმა საჯარიმოს გარედან ძლიერად დაარტყა, კარის წინ დარჩენილმა ვიქტორ ოსიმენს ბურთს ფეხი მიარტყა და „ნაპოლი“ დააწინაურა – 2:1. მაგრამ 72-ე წუთზე „ფროზინონეს“ სწრაფი კონტრშეტევა კვლავ ხედირამ დააგვირგვინა და ანგარიში მეორედ გაათანაბრა.
75-ე და 76-ე წუთებზე ისევ კვარაცხელიამ სცადა „ნაპოლის“ დაწინაურება, მაგრამ ორივე შემთხვევაში მეკარე ტურატიმ საიმედოდ ითამაშა.
32 ტურის შემდეგ „ნაპოლი“ 49 ქულით მე-8 ადგილზე დარჩა „ფროზინონე“ (27) მე-17 პოზიციას იკავებს. რაც შეეხება ხვიჩა კვარაცხელიას, ქართველ თავდამსხმელს მიმდინარე სეზონში 10 გოლი და 6 საგოლე გადაცემა დაუგროვდა.
1tv.ge
