არავის არაფერი არ უფორმდება ხოლმე, უბრალოდ, მთავრობა იღებს გადაწყვეტილებას სახელმწიფო ქონების განკარგვის ან განკარგვაში ცვლილებების შეტანის შესახებ,- ამის შესახებ პირველმა ვიცე - პრემიერმა, ეკონომიკისა და მდგრადი განვითარების მინისტრმა, ლევან დავითაშვილმა განაცხადა, როდესაც უპასუხა ჟურნალისტის შეკითხვას, ირაკლი ღარიბაშვილის პრემიერ-მინისტრობის დროს, ასობით სახელმწიფო ქონების პრივატიზება მოხდა და ამ მიმართულებით ახლა, რა იცვლება და შეცვლის შემთხვევაში, იქნება თუ არა გადაწყვეტილება ცნობილი.
როგორც დავითაშვილმა აღნიშნა, ზოგადად ინფორმაცია ხელმისაწვდომი იქნება, თუმცა სახელმწიფო ქონების ნაწილში დასმულ შეკითხვას არ ეთანხმება.
„ის, რომ საზოგადოებისთვის ცნობილი იქნება მთავრობის გადაწყვეტილებების შესახებ ამას გიდასტურებთ, ეს იყო პრემიერ-მინისტრის გადაწყვეტილება, თქვენ ამ ინფორმაციას მიიღებთ ხოლმე. მეორე ნაწილში არ დაგეთანხმებით, არავის არაფერი არ უფორმდება ხოლმე, უბრალოდ, მთავრობა იღებს გადაწყვეტილებას სახელმწიფო ქონების განკარგვის ან განკარგვაში ცვლილებების შეტანის შესახებ, რომელიც გამომდინარეობს საზოგადოებრივი მაღალი ინტერესიდან და ქვეყნის ინტერესებიდან, ასე რომ ეს მომენტი, მოდი, დავაკონკრეტოთ. რაც შეეხება ინფორმაციაზე ხელმისაწვდომობას, დიახ, პრემიერ-მინისტრის გადაწყვეტილების შესაბამისად თქვენ ინფორმაცია სრულად გექნებათ“, - განაცხადა ლევან დავითაშვილმა.
გარდა ამისა, დავითაშვილმა უპასუხა კიდევ ერთ შეკითხვას, რომლის თანახმად, მთავრობის განკარგულებები, რომლებიც 2020 წლის შემდეგ არ ქვეყნდებოდა, ახლა უკვე თუ გამოქვეყნდება.
„განკარგულებებთან დაკავშირებით უკვე მოგახსენეთ, რომ ეს პრემიერ - მინისტრის გადაწყვეტილებაა და ეს ასეც იქნება, საზოგადოებას ექნება სრული ინფორმაცია მთავრობის გადაწყვეტილების, განკარგულებებისა და დადგენილების შესახებ", - განაცხადა დავითაშვილმა.
