რა მოხდა სინამდვილეში რუსთაველზე - "ქართული ოცნება" მსხვერპლად ლაზარეს ირჩევს
18.06.2023 ნახვები: 578
ვინ დაწვა პოლიციელის მანქანები რუსთაველის გამზირზე და ხომ არ იყოს ეს გამიზნული ქმედება, რომ შემდეგ აქციის მონაწილეებისთვის მანქანების ძარცვა და დაწვა დაებრალებინათ? - "შაბათის ეთერმა" მოიპოვა კადრები, რომელიც თბილისის საკრებულოს დეპუტატმა, ლილე ლიპარტელიანმა გადაიღო. ის ამბობს, რომ პოლიციის მანქანებს ვინც წვავდა, სავარაუდოდ, წინასწარ მიყვანილი ჯგუფი იყო, რომელსაც აქციასთან კავშირი არ ჰქონია
არსებობს კიდევ ერთ მოწმე, რომელმაც დაინახა, როგორ ცლიდნენ პოლიციელების მანქანებს ვიდრე ის დაიწვებოდა. გიორგი ჯვარშეიშვილის ჩვენება ლაზარეს საქმეს თავდაყირა აყენებს. გიორგი იმ დღეს კოლეგებთან და მეგობრებთან ერთად ქართლი ოცნების მიერ მიღებულ რუსულ კანონს აპროტესტებდა. "თბილისი მარიოტთან" მყოფმა საკუთარი თვალით დაინახა, როგორ ჩხრეკდნენ კრიმპოლის თანამშრომლები თეთრი ფერის "ტოიოტა კოროლას".
გიორგის მონაყოლს ადასტურებს "შაბათის ეთერის" მიერ მოპოვებული საქმის მასალები. ვიდეოკადრები რესტორან "ზოდიქოს" სათვალთვალო კამერამ გადაიღო. ჩანაწერი უხარისხოა, სახეების გარჩევა რთულია, მაგრამ სილუეტები კარგად ჩანს. მანქანასთან რამდენიმე ადამიანი მიდის, ჯერ საბარგულს აღებენ, შემდეგ სალონს. რამდენიმე წუთი მანქანას ამოწმებენ, ნაწილი რჩება, მეორე ნაწილი გადის ტერიტორიიდან. ძალიან მალე კი თეთრი "ტოიოტა კოროლა" საერთოდ გაჰყავთ ადგილიდან.
