14 მარტს რუსთაველის გამზირზე მიმდინარე აქციის დროს ევროკავშირის დროშის დაწვის ფაქტზე შინაგან საქმეთა სამინისტრომ ხუთი პირი ადმინისტრაციული წესით დააჯარიმა.
შინაგან საქმეთა სამინისტროს პრესსამსახურის ინფორმაციით, აქციის მონაწილეები ადმინისტრაციული სამართალდარღვევის კოდექსის 174-ე მუხლის შესაბამისად დაჯარიმდნენ, რაც ევროპის კავშირის, ჩრდილო-ატლანტიკური ხელშეკრულების ორგანიზაციის ან სხვა საერთაშორისო ორგანიზაციის ოფიციალური სიმბოლოს შებღალვას ან სხვა სახელმწიფოს დროშის, გერბის შებღალვას გულისხმობს და ფიზიკური პირის 1 000 ლარით დაჯარიმებას ითვალისწინებს.
შინაგან საქმეთა სამინისტროში აცხადებენ, რომ შესაძლო ადმინისტრაციულ დარღვევასთან დაკავშირებით მოკვლევა გრძელდება. მათივე ცნობით, ადმინისტრაციულ სამართალდამრღვევთა რიცხვი შესაძლოა, გაიზარდოს.
