მივესალმები ნიკა მელიას ძალიან ღირსეულ განცხადებას, მოქალაქე და პოლიტიკოსი ყოველთვის უნდა იყოს სიმართლის, კოლეგიალიზმის მხარეს, უნდა იყოს პატრიოტი, – ამის შესახებ „ლელოს“ წევრმა, გრიგოლ გეგელიამ განაცხადა.
მისივე თქმით, ნიკა მელია ძალიან კარგად ხედავს, რამდენად მნიშვნელოვანია დღეს, რომ სწორი, ჯანსაღი ძალები ერთობლივად იბრძოდნენ იმ საერთო მიზნისთვის, რაც არის ქვეყნიდან კრემლის რეჟიმის განდევნა, ქვეყნის გამთლიანება და სწრაფი ტემპით წინსვლა.
„მინდა, მივესალმო ნიკა მელიას ძალიან ღირსეულ განცხადებას. რა თქმა უნდა, ადამიანი, მოქალაქე და პოლიტიკოსი ყოველთვის უნდა იყოს სიმართლის, კოლეგიალიზმის მხარეს და უნდა იყოს პატრიოტი, რაც ნიშნავს საერთო მიზნის გარშემო გაერთიანებას. ვფიქრობ, ნიკა მელია ძალიან კარგად ხედავს, რამდენად მნიშვნელოვანია დღეს, რომ სწორი, ჯანსაღი ძალები ერთობლივად იბრძოდნენ იმ საერთო მიზნისთვის, რაც არის ამ ქვეყნიდან კრემლის რეჟიმის განდევნა, ქვეყნის გამთლიანება, გაერთიანება და სწრაფი ტემპით წინსვლა.
რაც შეეხება ზოგიერთი რადიკალის ქმედებას, პასუხი ზედაპირზეა. სამწუხაროდ, ადამიანებს, რომლებიც არიან ფანატიკურად შეპყრობილი ერთი თუ მეორე იდეით, არ ესმით, მსუბუქად თუ ვიტყვით, იმ ჯანსაღი მნიშვნელობის არსებობა, რომელიც უნდა არსებობდეს ქვეყანაში, რათა ჩვენ შევძლოთ ივანიშვილის დამარცხება. ვფიქრობ, ეს ადამიანები ცალკეული ჯგუფები არიან და არ ასახავენ მთლიანობაში არც ერთი პარტიის სულისკვეთებას. ამიტომაც მე ვერ ვხედავ, რომ ეს შეუშლის ხელს პოტენციურ თანამშრომლობას იმ ძალთა შორის, რომელიც ხედავს, რომ ეს ქვეყანა სასწრაფოდ უნდა გათავისუფლდეს ივანიშვილის მარწუხებიდან, რადგან თითოეული დღე ამ ხელისუფლების მმართველობის ქვეშ არის წაგებული დამარცხებული დღე“, – განაცხადა გეგელიამ.
