ამის შესახებ ნადარაიამ საკონსტიტუციო სასამართლოში განაცხადა, სადაც მმართველი გუნდის მიერ ხუთი ოპოზიციური პოლიტიკური გაერთიანების აკრძალვის მოთხოვნით წარდგენილი სარჩელის განხილვა მიმდინარეობს.
სხდომის მსვლელობისას სასამართლოს თავმჯდომარემ პარტიების წარმომადგენლებს რამდენჯერმე მისცა შენიშვნა და განმარტა, რომ სასამართლოს ამოცანა პოლიტიკური შეფასებების გაკეთება კი არა, სარჩელის სამართლებრივი საფუძვლიანობის დადგენაა.
„გასაგებია, რომ სარჩელი პოლიტიკურ პარტიებს ეხება და შემხებლობა აქვს პოლიტიკასთან, მაგრამ პოლიტიკური განცხადებები უნდა გაკეთდეს გარეთ. როცა სასამართლოში საუბრობთ, პოზიციის სისწორე სამართლებრივად უნდა დაასაბუთოთ“, – განაცხადა ნადარაიამ.
მისივე თქმით, საკონსტიტუციო სასამართლო პოლიტიკურ გადაწყვეტილებებს არ იღებს და საქმის განხილვისას მხოლოდ სამართლებრივი არგუმენტებით ხელმძღვანელობს.
„ჩვენ პოლიტიკოსები არა ვართ და პოლიტიკურ გადაწყვეტილებებს არ ვიღებთ. ჩვენ მხოლოდ სამართლებრივ ჭრილში უნდა შევაფასოთ, რამდენად საფუძვლიანია საქმე ან რამდენად საფუძვლიანი არ არის. დაიმახსოვრეთ, რომ სასამართლოსთვის პოლიტიკურ განცხადებებს აქვს ნულის ფასი!“ – მიმართა ნადარაიამ პარტიების წარმომადგენლებს.
საკონსტიტუციო სასამართლოში 21 ოქტომბერს დაიწყო პარლამენტის 88 დეპუტატის სარჩელის განხილვა, რომლითაც ხუთი ოპოზიციური პოლიტიკური გაერთიანების არაკონსტიტუციურად ცნობაა მოთხოვნილი.
საქმეს საკონსტიტუციო სასამართლოს შვიდი მოსამართლისგან შემდგარი პლენუმი განიხილავს.
