"კახა კალაძეს ნერვებმა უმტყუნა" - ამის შესახებ "ერთიანობა - ნაციონალური მოძრაობის" ერთ-ერთმა ლიდერმა, თინა ბოკუჩავამ განაცხადა და დღეს, მელიქიშვილის გამზირზე განვითარებულ მოვლენებს გამოეხმაურა.
მისი თქმით, "დღევანდელი ფიზიკური ანგარიშსწორების დავალება ცენტრალიზებულად არ იყო გაცემული" და კალაძემ პირადად გასცა მშვიდობიანი მომიტინგეების დარბევის დავალება, რათა "მან და მისმა შტაბის წევრებმა მშვიდად შეძლონ შტაბში შესვლა და გამოსვლა".
"რა თქმა უნდა არანაირი გამოძიება, ამ ადამიანების პასუხისგებაში მიცემა ამ რეჟიმის პირობებში არ იქნება. მე სხვათაშორის დღევანდელ კადრებს როდესაც ვუყურებდი, ვფიქრობ, რომ დღევანდელი ფიზიკური ანგარიშსწორების დავალება ცენტრალიზებულად არ იყო გაცემული და კახა კალაძეს ნერვებმა უმტყუნა და შესაბამისად მან პირადად გასცა დავალება იმისთვის, რომ დაერბიათ მშვიდობიანი მომიტინგეები იმიტომ, რომ მან და მისმა შტაბის წევრებმა მშვიდად შეძლონ შტაბში შესვლა და გამოსვლა," - განაცხადა თინა ბოკუჩავამ.
შეგახსენებთ, რომ დღეს, მელიქიშვილის გამზირზე, კახა კალაძის საარჩევნო შტაბთან, მიმდინარე აქციის დროს "ქართული ოცნების" პარტაქტივი და ე.წ. ტიტუშკები მოქალაქეებს თავს დაესხნენ. აქციის მონაწილეებს აღენიშნებათ ფიზიკური დაზიანებები. დაპირისპირების დროს დაშავდა ჟურნალისტიც.
"ოცნების" წარმომადგენლებმა მოქალაქეებს აგინეს, ფიზიკურად გაუსწორდნენ და ბოთლებს ესროდნენ.
პოლიცია ადგილზე დაპირისპირების დაწყების შემდეგ გამოჩნდა. ამ დრომდე პოლიციას "ოცნების" პარტაქტივი არ დაუკავებია.
