ისრაელმა იემენში რამდენიმე სტრატეგიულ ობიექტზე იერიში მიიტანა. ინფორმაციას ისრაელის მედია ავრცელებს.
მათივე ცნობით, ბენიამინ ნეთანიაჰუ პირობას დებს, რომ დარტყმებს გააგრძელებს.
„ვინც არ უნდა დაგეგმოს ჩვენზე თავდასხმა, ჩვენც დავესხმებით თავს. „ჰუსიტების“ ტერორისტული რეჟიმი მკაცრი გზით სწავლობს, რომ ის გადაიხდის და უკვე ძალიან დიდ ფასს იხდის ისრაელის წინააღმდეგ აგრესიისთვის“, – განაცხადა ისრაელის პრემიერ-მინისტრმა, ბენიამინ ნეთანიაჰუმ.
ისრაელის საჰაერო ძალებმა სანააში სამხედრო კომპლექსი დაბომბეს, სადაც იემენის პრეზიდენტის სასახლე, საწვავის საწყობი და ორი ელექტროსადგური მდებარეობს.
ისრაელის თავდაცვის მინისტრმა, ისრაელ კაცმა განაცხადა, რომ ისრაელისკენ გაშვებული ყოველი რაკეტისთვის „ჰუსიტები“ ბევრად უფრო მეტს გადაიხდიან.
„ისრაელის თავდაცვის ძალებმა ახლახან გაანადგურეს „ჰუსიტების“ საპრეზიდენტო სასახლე იემენში და თავს დაესხნენ საწვავის საწყობებსა და ელექტროსადგურებს. ჩვენ ვაგრძელებთ იერიშებს ინფრასტრუქტურულ ობიექტებზე, რომლებიც გამოიყენება „ჰუსიტების“ ტერორიზმის ხელშესაწყობად. ისრაელისკენ გაშვებული ყოველი რაკეტისთვის „ჰუსიტები“ ბევრად უფრო მეტს გადაიხდიან“, – აღნიშნა ისრაელ კაცმა.
