დონალდ ტრამპი - აშშ-მა უკრაინას, სამშვიდობო შეთანხმების ფარგლებში, შესაძლოა, საჰაერო მხარდაჭერა გაუწიოს

აშშ-ის პრეზიდენტი, დონალდ ტრამპი აშშ-ის ჯარების უკრაინაში განლაგებას გამორიცხავს, თუმცა აცხადებს, რომ შეერთებულმა შტატებმა ქვეყანას, შესაძლოა, სამშვიდობო შეთანხმების ფარგლებში, საჰაერო მხარდაჭერა გაუწიოს.

„როდესაც საქმე უსაფრთხოებას ეხება, (ევროპელები) მზად არიან, ადგილზე ხალხი გაგზავნონ. ჩვენ მზად ვართ, დავეხმაროთ მათ სხვადასხვა რამით, განსაკუთრებით, ალბათ საჰაერო მხარდაჭერით“, - განაცხადა ტრამპმა Fox News-ის გადაცემა „Fox & Friends“-თან ინტერვიუში, თუმცა დეტალები არ დაუკონკრეტებია.

თეთრი სახლის პრესსპიკერმა, კაროლინ ლივიტმა დაადასტურა, რომ აშშ-ის მხრიდან საჰაერო მხარდაჭერა „ვარიანტი და შესაძლებლობაა“, თუმცა, ტრამპის მსგავსად, დეტალები არც მას დაუკონკრეტებია.

„პრეზიდენტმა ცალსახად განაცხადა, რომ აშშ-ის სამხედროები უკრაინაში ადგილზე არ განლაგდებიან, მაგრამ ჩვენ, რა თქმა უნდა, შეგვიძლია დავეხმაროთ კოორდინაციაში და შესაძლოა, ჩვენს ევროპელ მოკავშირეებს უსაფრთხოების გარანტიების სხვა საშუალებებიც მივაწოდოთ“, - განაცხადა თეთრი სახლის პრესსპიკერმა.