ნინო დათაშვილი - ამ ექსპერტიზით ვერ დამაშინებთ!
04.08.2025 ნახვები: 403
პატიმრობაში მყოფი აქტივისტი ნინო დათაშვილი პროკურატურას უკანონო დევნაში და არაადამიანურ მოპყრობაში ადანაშაულებს.
მისი თქმით, გაუსაძლისი ტკივილების მიუხედავად, მკურნალობის ნაცვლად, მას ფსიქიატრიულ ექსპერტიზას უნიშნავენ.
ის აცხადებს, რომ ფსიქიატრიული ექსპერტიზით მას ვერ დააშინებენ.
„პროკურატურას! 2019 წელს რომ ემოციური ფონი მქონდა, ჩემი გაუსაძლისი ტკივილებით იყო გამოწვეული. ოპერაციის გაკეთებიდან ოთხ თვეში, მეორე ოპერაციას ვსაჭიროებდი. ემოციური ფონი იყო მწვავე ანთებით პერიოდში, რა დროსაც მქონდა გაუსაძლისი ტკივილები. მას მერე ათასმა წყალმა ჩაიარა, თუმცა დაზიანებული ხერხემალი დამრჩა. ახლაც გაუსაძლისი ტკივილები მაქვს, რაც გამოიწვია თქვენ მიერ შეფარდებულმა პატიმრობამ.
ემოციური ფონი მუდმივი არაა, ის სტრესზე და დისტრესზე ორგანიზმის რეაქციაა! გამწვავებული ტკივილების ფონზე, მკურნალობის ნაცვლად, მიტარებთ ფსიქიატრიულ ექსპერტიზას? ეს სხვა არაფერია გარდა ჩემს მიმართ უკანონო დევნის გაგრძელება და არაადამიანური მოპყრობა. ამ ექსპერტიზით ვერ დამაშინებთ!
ყველას დიდი მადლობა გამოხმაურებისთვის და მხარდაჭერისთვის! ყველას გიყურებთ, ყველანი მიყვარხართ. ძალიან სწორად აფასებთ, რაც მე სახელმწიფო მანქანამ დამატეხა თავს. ეს ყველას შეეხება. ყველა ან ციხეში ან ფსიქიატრიულში ვიქნებით, თუ პროტესტი გაჩერდა.
მანქანა ვერ გაგვჭყლეტს ვერც ინდივიდებს და ვერც საქართველოს ხალხს. სადაც არ უნდა ვიყო, ყველგან დავამტკიცებ ჩემს სიმართლეს. ამჯერად გავიმარჯვებთ სახელოვნად!“, - წერია ნინო დათაშვილის წერილში, რომელიც სასჯელაღსრულების დაწესებულებიდან ადვოკატებმა გამოიტანეს.
