ეს ადამიანი [ირაკლი კობახიძე], ფაქტობრივად, არის „პერსონა ნონ გრატად“ გამოცხადებული, რადგან მან თვითონ გაიფუჭა და გააფუჭა საქართველოს ურთიერთობები დასავლეთთან - დავინახავ, პარლამენტში უმცირესობაში რომ დაჯდება ბიძინა ივანიშვილთან ერთად, როგორ იჭიკჭიკებს მერე ეს არაფრისმაქნისი ადამიანი,- ამის შესახებ “ერთიანობა - ნაციონალური მოძრაობის” ლიდერმა, გიორგი ვაშაძემ ჟურნალისტებთან საუბრისას განაცხადა.
ვაშაძის თქმითვე, ირაკლი კობახიძეს „ვაშინგტონში არ ჩაესვლება და მას არავინ ესაუბრება”.
„[ირაკლი] კობახიძეს ვაშინგტონში არ ჩაესვლება. კობახიძე ჩავიდა ნიუ-იორკში, სადაც სულ რომ შეზღუდვები იყოს, მაინც ჩავა ნებისმიერი ქვეყნის ლიდერი, მაგალითად, ირანის სახელმწიფოს ლიდერიც. ისიც ჩადის გაერო-ში სიტყვით გამოსვლისთვის. კობახიძეს არ ესაუბრება არავინ. ეს ადამიანი, ფაქტობრივად, არის „პერსონა ნონ გრატად“ გამოცხადებული, რადგან მან თვითონ გაიფუჭა და გააფუჭა საქართველოს ურთიერთობები დასავლეთთან. მესამე და ყველაზე მნიშვნელოვანი, კობახიძეს არავინ არ ეკითხება არაფერს. ის გადავა ოპოზიციაში, იქნება უმცირესობაში და დავინახავ ერთი პარლამენტში უმცირესობაში რომ დაჯდება ბიძინა ივანიშვილთან ერთად, მერე როგორ იჭიკჭიკებს ეს არაფრისმაქნისი ადამიანი, რომელმაც ცუდის მეტი ქვეყანას არაფერი მოუტანა“, - განაცხადა გიორგი ვაშაძემ.
ამასთან, როგორც პარტიის ერთ-ერთმა ლიდერმა აღნიშნა, „ქართული ოცნება” საქართველოს ინტერესებს არ ემსახურება, არამედ საკუთარ “პერსონალურ ინტერესს”.
„ამერიკის ხმის განცხადებაში ყველაზე საინტერესო და საყურადღებო იყო, რომ ბიძინა ივანიშვილზე საუბარია, როგორც რუსული სადაზვერვო სამსახურების დავალებების შემსრულებელზე. ორჯერ ორი ოთხია. ეს ხალხი საქართველოს ინტერესებს არ ემსახურება. ემსახურებიან პერსონალურ ინტერესებს, რომ გამდიდრდნენ და ყველას ინტერესს, ვინც წინააღმდეგი იქნება ევროინტეგრაციის. მათ არც ევროკავშირი უნდათ და შეაჩერეს პროცესი. უვიზო მიმოსვლასაც ხედავთ, რომ ფაქტობრივად, ძირს უთხრიან. იმიტომ, რომ სწორედ რუსეთის ინტერესებში შედის, რომ საქართველო არ გახდეს ევროკავშირის წევრი. ამიტომ, 26 ოქტომბერს ჩვენ ყველამ ერთად უნდა გავიმარჯვოთ, რომ უმცირესობაში მყოფი „ქართული ოცნება“ წავიდეს ოპოზიციაში", - აღნიშნა ვაშაძემ.
მისივე განცხადებით, „ქართული ოცნება” უმცირესობაშია გადასული, 20%-ზე მეტს ვერ აიღებს [არჩევნებზე] და მარცხისთვის არის განწირული”.
