რომან გოცირიძე - თუ „ქართული ოცნება“ არჩევნების გაყალბებას გაბედავს, კატასტროფულ შედეგს მიიღებს

თუ "ქართული ოცნება" არჩევნების გაყალბებას გაბედავს, კატასტროფულ შედეგს მიიღებს - მას სანქციები სანატრელი გაუხდება, - ამის შესახებ ჟურნალისტებს პარლამენტის ოპოზიციონერმა წევრმა რომან გოცირიძემ განუცხადა.

გოცირიძის შეფასებით, ცივილიზებული სამყაროსთვის "ქართული ოცნების" ხელისუფლება კეთროვანი, მოკვეთილი ხელისუფლებაა.

"სახელისუფლო გუნდი არის ბიძინა ივანიშვილის კლანი, რომელიც მთელს მსოფლიოს სძულს - ეს არის ადამიანთა ხროვა, რომელთაც მეგობარი არა ჰყავთ! ეძებენ მეგობარს! საქართველოს პრემიერ მინისტრი დადგა ტერორისტის გვერდით, რომელიც რამდენიმე დღის წინ ირანში ააფეთქეს, ხოლო ცივილიზებული სამყაროდან არ არსებობს ქვეყანა, რომელიც საქართველოს ხელისუფლებასთან მეგობრობს.

ამიტომ, რაც არ უნდა ილუღლუღოს "ქართული ოცნების" ხელისუფლებამ, მას არც საქართველოს მოქალაქეები დაუჯერებენ და დასავლეთსაც ვერდიქტი აქვს გამოტანილი", - განაცხადა რომან გოცირიძემ.