სად და როგორ უნდა დარეგისტრირდნენ ორგანიზაციები "რუსული კანონის" რეესტრში? - პროცედურა

"რუსული კანონი" დღეს ამოქმედდა. შესაბამისი კანონქვემდებარე აქტები უკვე ძალაშია.

ახლა, მთავარი კითხვაა, როგორ უნდა დარეგისტრირდნენ ორგანიზაციები, რომლებიც ამ კანონის ფარგლებში მოქმედებას გადაწყვეტენ.

იუსტიციის სამინისტროს საზოგადოებასთან ურთიერთობის სამსახურში BM.GE-ის უთხრეს, რომ ინფორმაციის მისაღებად, თუ სად და როგორ უნდა დარეგისტრირდნენ მედია და არასამთავრობო ორგანიზაციები საჯარო ინფორმაცია უნდა გამოვითხოვოთ, რომლის პასუხიც 10 სამუშაო დღეში იქნება.

ამის შემდეგ, იუსტიციის სამინისტროს ცხელ ხაზს დავუკავშირდით იგივე კითხვებით. ოპერატორის თქმით, ამ ეტაპზე რეგისტრაცია მხოლოდ ფიზიკურად და ცენტრალურ ფილიალშია შესაძლებელი:

"დღეიდან განცხადებების მიღება დაწყებულია, თუმცა მხოლოდ ცენტრალურ იუსტიციის სახლში (სანაპიროზე). თბილისის მასშტაბით მხოლოდ ცენტრალური იუსტიციის სახლი იბარებს. რამდენიმე დღეში, შეიძლება გვეცნობოს ინფორმაცია, რომ სხვა იუსტიციის სახლებიც ჩაიბარებენ კონკრეტულ განცხადებას, მაგრამ დღევანდელი მდგომარეობით, მხოლოდ ცენტრალური იუსტიციის სახლი იბარებს მსგავს განცხადებას. შეუსვენებლად ვმუშაობთ 9:00 საათიდან 18:00 საათამდე. მოსვლის დროს, მაინც იკითხეთ ფილიალის მენეჯერი, ამ ტიპის განცხადებასთან დაკავშირებით ვარ მოსული-თქო".

შეიძლება თუ არა აპლიკაციის ონლაინ შევსება?

"ამ ეტაპზე, არა. ზოგადად, საჯარო რეესტრში ნებისმიერ განცხადებას ვიღებთ ონლაინ, მაგრამ ეს რადგან ახალია და სარეგისტრაციო ფორმებიც ახლა დგინდება, ადგილზე უნდა მოხვიდეთ", - გვითხრეს ცხელ ხაზზე.

აღსანიშნავია, რომ "უცხოური გავლენის გამჭვირვალობის შესახებ" კანონი ძალის ინტერესების გამტარებელ ორგანიზაციად მოიაზრებს ყველა იმ არასამეწარმეო (არაკომერციული) იურიდიულ პირს, რომელიც არ არის ადმინისტრაციული ორგანოს მიერ დაფუძნებული, არ არის სპორტული ფედერაცია ან შესაბამისი კანონით გათვალისწინებული სისხლის დაწესებულება და კალენდარული წლის განმავლობაში შემოსავლის 20%-ზე მეტს იღებს უცხოური ძალისგან. უცხოური ძალის ინტერესების გამტარ ორგანიზაციად ასევე ითვლება ის იურიდიული პირი, რომელიც ფლობს მედიასაშუალებას და რომლის მიერ კალენდარული წლის განმავლობაში მიღებული არაკომერციული შემოსავლის 20%-ზე მეტის წყარო უცხოურია. ზემოთ მოცემულ სუბიექტებს, კანონი „უცხოური ძალის ინტერესების გამტარებელ ორგანიზაციათა რეესტრში“ რეგისტრაციას ავალდებულებს.

BM.GE