წინსვლის საუკეთესო გზა ჩირაღდნის ახალი თაობისთვის გადაცემაა, ეს ჩვენი ერის გაერთიანების საუკეთესო გზაა, - ამის შესახებ აშშ-ის პრეზიდენტმა, ჯო ბაიდენმა თეთრი სახლის ოვალური კაბინეტიდან გავრცელებული მიმართვისას განაცხადა.
„მჯერა, რომ ჩემი, როგორც პრეზიდენტის მიღწევები, მსოფლიოში ჩემი ლიდერობა, ამერიკის მომავლის შესახებ ჩემი ხედვა - ეს ყველაფერი მეორე ვადას იმსახურებდა. მაგრამ ჩვენი დემოკრატიის გადარჩენას წინ არაფერი არ უნდა აღუდგეს, მათ შორის, პირადი ამბიციები. ამიტომ, გადავწყვიტე, რომ წინსვლის საუკეთესო გზა ჩირაღდნის ახალი თაობისთვის გადაცემაა. ეს ჩვენი ერის გაერთიანების საუკეთესო გზაა“, - განაცხადა ჯო ბაიდენმა.
საპრეზიდენტო არჩევნებში კანდიდატურის მოხსნის შემდეგ გავრცელებულ პირველ საჯარო მიმართვაში აშშ-ის პრეზიდენტმა კამალა ჰარისი შეაქო და მას მადლობა გადაუხადა.
„ის ძლიერია, მას შეუძლია და ის ჩემთვის შესანიშნავი პარტნიორი და ჩვენი ქვეყნისთვის შესანიშნავი ლიდერია“, - აღნიშნა აშშ-ის პრეზიდენტმა.
მომდევნო ექვსი თვის განმავლობაში ჩემი, როგორც პრეზიდენტის მოვალეობის შესრულებაზე ვიქნები კონცენტრირებული, - ამის შესახებ აშშ-ის პრეზიდენტმა, ჯო ბაიდენმა თეთრი სახლის ოვალური კაბინეტიდან გავრცელებული მიმართვისას განაცხადა.
„ეს ნიშნავს, რომ მე შრომისმოყვარე ოჯახებისთვის ხარჯების შემცირებასა და ჩვენი ეკონომიკის ზრდას გავაგრძელებ. მე გავაგრძელებ ჩვენი პირადი თავისუფლებებისა და ჩვენი სამოქალაქო უფლებების დაცვას, ხმის მიცემისა და არჩევანის უფლების ჩათვლით. გავაგრძელებ სიძულვილისა და ექსტრემიზმის დაგმობას, რომ ამერიკაში პოლიტიკური ან სხვა სახის ძალადობის ადგილი არ არის“, - განაცხადა ჯო ბაიდენმა.
აშშ-ის პრეზიდენტმა აღნიშნა, რომ გააგრძელებს მუშაობას, რათა აშშ კვლავ ძლიერი და უსაფრთხო დარჩეს.
„ამ საუკუნეში პირველი პრეზიდენტი ვარ, რომელმაც ამერიკელ ხალხს მოახსენა, რომ აშშ არსად მსოფლიოში ომში არ არის. ჩვენ გავაგრძელებთ ღირსეული ქვეყნების კოალიციის გაერთიანებას, რათა პუტინის მიერ უკრაინის ხელში ჩაგდება შევაჩეროთ და მან კიდევ უფრო მეტი ზიანი არ გამოიწვიოს. ჩვენ ნატო-ს გავაძლიერებთ და მე მას კიდევ უფრო ძლიერსა და ერთიანს გავხდი, ვიდრე ოდესმე ჩვენს ისტორიაში ყოფილა. წყნარ ოკეანეში ჩვენი მოკავშირეებისთვის იმავეს კეთებას გავაგრძელებ. იცით, რომ როდესაც მე თანამდებობა დავიკავე, საყოველთაოდ მიღებული თვალსაზრისი იყო, რომ ჩინეთი ამერიკის შეერთებულ შტატებს გაუსწრებდა და აჯობებდა. ეს ასე აღარ არის. მე ღაზაში ომის დასასრულებლად, მძევლების სახლში დასაბრუნებლად, ახლო აღმოსავლეთში მშვიდობისა და უსაფრთხოების დასამყარებლად და ამ ომის დასასრულებლად მუშაობას გავაგრძელებ“, - აღნიშნა ჯო ბაიდენმა.
