"საქართველომ პორტუგალია შოკში ჩააგდო" - მსოფლიო მედია

საქართველომ პორტუგალია შოკში ჩააგდო - ასე ეხმაურება მსოფლიო მედია საქართველოს გამარჯვებას პორტუგალიის წინააღმდეგ.

„საქართველომ ისტორია დაწერა და ევრო 2024-ზე პორტუგალიასთან გამარჯვებით პირველ მსხვილ სატურნირო ეტაპს მიაღწია“, - წერს BBC.

“ქვეყნის ისტორიაში პირველ დიდ ტურნირზე ასპარეზობისას, საქართველომ ევრო 2024-ზე გულშემატკივრების გული დაიპყრო თავისი უშიშრობითა და მაღალი ინტენსივობის ფეხბურთით“, - წერს CNN.

„საქართველომ ევრო 2024-ზე ერთ-ერთი ყველაზე გასაოცარი შედეგი დააფიქსირა, როდესაც პორტუგალია 2-0 დაამარცხა“, - იტყობინება Yahoo Sport-ი.

„ეს შესანიშნავი მიღწევაა საქართველოსთვის, ყოფილი საბჭოთა რესპუბლიკისთვის, რომელიც ევროკავშირის წევრობის კანდიდატია, მაგრამ ამჟამად პოლიტიკურ ქაოსშია "უცხოური გავლენის" კანონის გამო“, - წერია France 24-ი.

“ეს იყო ღამე, როდესაც საქართველო მთავარ ტურნირზე პირველი გამოსვლით პორტუგალიასთან ბრწყინვალე გამარჯვების წყალობით მერვედ ფინალში გავიდა და ღამე, რომელიც დიდხანს დარჩება ათასობით გულშემატკივრის მეხსიერებაში, რომლებიც აქ იყვნენ ისტორიის სანახავად“, - იტყობინება Guardian-ის კორესპონდენტი.

გუშინ საქართველოსთვის ისტორიული დღე იყო. საქართველოს საფეხბურთო ნაკრებმა პორტუგალია 2:0 დაამარცხა და მერვედფინალშია. ამ შედეგით საქართველოს ნაკრებმა 4 ქულა მოიპოვა. მატჩის პირველი გოლი შეხვედრის დაწყებიდან მეორე წუთზე ხვიჩა კვარაცხელიამ გაიტანა, ხოლო მეორე გოლი მეორე ტაიმში პენალტით გიორგი მიქაუტაძემ გაიტანა.