აშშ-ის წარმომადგენელთა პალატამ დაამტკიცა ორპარტიული რეზოლუცია, რომელიც რუსეთის მიერ უკრაინელი ბავშვების გატაცებას გმობს.
რეზოლუციის საბოლოოდ დასამტკიცებლად კონგრესის ორივე პალატის მხარდაჭერა იქნება საჭირო.
როგორც „ამერიკის ხმა“ წერს, რეზოლუციის თანაავტორმა, დემოკრატმა კონგრესმენმა, სიუზან უაილდმა განაცხადა, რომ რუსეთის ქმედებები ბავშვების წინააღმდეგ გენოციდის შესახებ საერთაშორისო კონვენციას არღვევს.
„უკრაინის წინააღმდეგ რუსეთის ძალადობის კამპანიაში ბავშვების წინააღმდეგ დანაშაულები ყველაზე ამაზრზენი ასპექტია“, – აღნიშნა მან.
უაილდის თქმით, ის კოლეგებთან ერთად გააგრძელებს მუშაობას, რათა რეზოლუციამ კონგრესისგან სრული მხარდაჭერა მიიღოს.
„რუსეთი ცდილობს, გაანადგუროს უკრაინელი ბავშვების თაობა“, – აღნიშნა კონგრესმენმა.
იანვარში უკრაინის დელეგაციის წარმომადგენლებმა, რომელთა შორისაც იყვნენ უკრაინელი მოზარდები, რომლებიც გადაურჩნენ რუსეთის მიერ გატაცებასა და წამებას, მოსმენების დროს ჩვენება მისცეს აშშ-ის ჰელსინკის კომისიას.
