აშშ-ის პრეზიდენტის, ჯო ბაიდენის განცხადებით, აშშ თუ უკრაინას დაშორდება, ევროპა რისკის ქვეშ აღმოჩნდება.
როგორც ბაიდენმა კონგრესში ყოველწლიური მიმართვისას განაცხადა, აშშ დარჩება ერთგული ნატო-სა და ევროპის უსაფრთხოების მიმართ.
„ამ ოთახში ვინმე თუ ფიქრობს, რომ პუტინი უკრაინაზე გაჩერდება, გარწმუნებთ, ის არ გაჩერდება. უკრაინას შეუძლია, შეაჩეროს პუტინი, თუ ჩვენ დავდგებით უკრაინის გვერდით და მივაწვდით იარაღს, რომელიც მას სჭირდება თავის დასაცავად. მხოლოდ ამას ითხოვს უკრაინა. ისინი არ ითხოვენ ამერიკელ ჯარისკაცებს. უკრაინისთვის დახმარებას ბლოკავენ ისინი, ვისაც სურს, რომ დავშორდეთ მსოფლიო ლიდერობას“, – აღნიშნა ამერიკის პრეზიდენტმა.
ამასთან, აშშ-ის პრეზიდენტმა ქვეყნის საზღვრის უსაფრთხოების საკითხზეც ისაუბრა. მან სასაზღვრო კანონპროექტის წარუმატებლობაში დონალდ ტრამპი დაადანაშაულა და კანონმდებლები გააკრიტიკა. ჯო ბაიდენის თქმით, კონგრესის წევრებს დონალდ ტრამპმა მოუწოდა, რომ კანონპროექტი დაებლოკათ.
„მე მითხრეს, რომ ჩემმა წინამორბედმა დაურეკა კონგრესის წევრებს სენატში, რათა მოეთხოვათ კანონპროექტის დაბლოკვა. ის გრძნობს, რომ ჩემთვის ეს პოლიტიკური გამარჯვება იქნება და მისთვის პოლიტიკური მარცხი“, – აღნიშნა ბაიდენმა.
მისი თქმით, აღნიშნული კანონპროექტი მას მისცემს საშუალებას, დროებით დახუროს საზღვრები, როდესაც მიგრანტების გადაჭარბებული რაოდენობა დაფიქსირდება.
