შოვის ტრაგედიიდან თორმეტი დღის შემდეგ სახელმწიფო მეწყერს გადარჩენილ მოქალაქეებზე არ ზრუნავს. სტიქიას გადარჩენილი დავით ჯელაძე ამბობს, რომ არცერთ უწყებას მისი ოჯახის არცერთ წევრთან არ დაურეკავს და არ მოუკითხავს თუნდაც მათი ფსიქოლოგიური მდგომარეობა.
"ფსიქოლოგებიც გვჭირდება, ალბათ, ისეთი საშინელება გავიარეთ, არანაირი დახმარება მთავრობიდან არ მიგვიღია, არანაირი მანუგეშებელი სიტყვა, არანაირი ზარი. ჩემი ოჯახის წევრები ამბობდნენ, რომ ხომ არ დაურეკავთ - მე ვეუბნებოდი, რომ ნუ ჩქარობთ, დაგვირეკავენ, ალბათ, და ყველაფერი თავის დროზე იქნება - ჯერ შოვის ტრაგედიაა, იქ ადამიანებს ეძებენ, ეს ყველაფერი რომ ჩაივლის, მერე დაგვირეკავენ და მოგვიხდიან მადლობას გმირული საქციელის გამო, იმ სიტუაციიდან რომ გამოვძვერით, ღმერთმა გადაგვარჩინა, ღმერთი რომ არ ყოფილიყო, ალბათ, მოვკვდებოდით ჩვენ,“ - ამბობს დავით ჯელაძე.
