თბილისის საქალაქო სასამართლომ მუხიანში მომხდარი მკვლელობის საქმეზე ბრალდებული პირი პატიმრობაში დატოვა.
როგორც სასამართლო სხდომაზე, ბრალდებულმა ემილ ნალიევმა განაცხადა, დაზარალებული მამაკაცი მასზე ფსიქოლოგიურ ზეწოლას ახორციელებდა.
„[ხორციელდებოდა] ფსიქოლოგიური ზეწოლა, მუქარა, ვადა, ვადაში ვგულისხმობ იმას, რომ ან დავთანხმდებოდი იმას, რასაც მთავაზობდა ან კიდევ სხვა რამეს მოიმოქმედებდა. მინდა, მაინც შეგახსენოთ ის, რაც მოხდა, გაითვალისწინოთ და უვადო პატიმრობა არ მომისაჯოთ“, - მიმართა მოსამართლეს ბრალდებულმა.
ცნობისთვის, 22 მარტს, თბილისში, მუხიანში 64 წლის მამაკაცი საცხოვრებელი კორპუსის ლიფტში გარდაცვლილი იპოვეს. პროკურატურის ინფორმაციით, შსს-ს მიერ მიერ ჩატარებული გამოძიებით დადგინდა, რომ ურთიერთშელაპარაკებისას ბრალდებულმა დაზარალებულს განსაკუთრებული სისასტიკით, დანით სხეულის სხვადასხვა არეში მრავლობითი ჭრილობები მიაყენა, შემდეგ ბენზინი დაასხა და ცეცხლი წაუკიდა. დანაშაულის ჩადენის შემდეგ ბრალდებული შემთხვევის ადგილიდან მიიმალა. მიყენებული დაზიანებების შედეგად დაზარალებული ადგილზე გარდაიცვალა.
სამართალდამცველებმა დანაშაულის ჩამდენი პირი იმავე დღეს დააკავეს. მას ბრალდება საქართველოს სისხლის სამართლის კოდექსის 109-ე მუხლის „მ“ ქვეპუნქტით (განზრახ მკვლელობა, ჩადენილი განსაკუთრებული სისასტიკით) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.
