რუსეთის პრეზიდენტის ვლადიმერ პუტინის განცხადებით, მუქარებზე პასუხისას რუსეთი მხოლოდ ჯავშანტექნიკით არ შემოიფარგლება. ამის შესახებ მან ვოლგოგრადში სტალინგრადის ბრძოლიდან 80 წლის თავზე გამართულ კონცერტზე განაცხადა.
“წარმოუდგენელია, მაგრამ ფაქტია - ჩვენ ისევ გვემუქრებიან გერმანული Leopard ტანკებით, რომლებზეც ჯვრებია”, - თქვა პუტინმა.
პუტინის თქმით, გერმანიას რუსეთის წინააღმდეგ ახალ ომში ითრევენ, მაგრამ არ დააკონკრეტა ვინ.
“ვინც გერმანიას რუსეთის წინააღმდეგ ახალ ომში ითრევს და უფრო უპასუხისმგებლოდ აცხადებს ამის შესახებ, როგორც უკვე მომხდარ ფაქტზე, მათ, ვისაც ბრძოლის ველზე სურს რუსეთზე გამარჯვების მოპოვება, როგორც ჩანს, არ ესმის, რომ რუსეთთან თანამედროვე ომი მათთვის სრულიად სხვანაირი იქნება.
ჩვენ ტანკებს მათ საზღვრებთან არ ვაგზავნით, მაგრამ გვაქვს ის, რითაც ვუპასუხებთ და ეს ჯავშანტექნიკის გამოყენებით, არ შემოიფარგლება. ყველას უნდა ესმოდეს ეს”, - თქვა პუტინმა.
ამავდროულად მან აღნიშნა, რომ რუსეთს მსოფლიოში “ბევრი მეგობარი ჰყავს”, მათ შორის ჩრდილოეთ ამერიკასა და ევროპაში.
