ქვეყნის უსაფრთხოება მნიშვნელოვანია, მაგრამ არანაკლებად მნიშვნელოვანია ის, რომ უსაფრთხოებასა და ადამიანის უფლებებს შორის ზღვარი არ უნდა დაიკარგოს, პრეზიდენტმა ვეტოს უფლება სწორედ ამიტომ გამოიყენა, დიდი იმედი მაქვს, რომ უმრავლესობა ვენეციის კომისიის მოსაზრებებს კარგად გაეცნობა და გადაწყვეტილებას ამის შემდეგ მიიღებს, – ამის შესახებ პრეზიდენტის საპარლამენტო მდივანმა, გიორგი მსხილაძემ განაცხადა.
მისი თქმით, როდესაც პრეზიდენტმა კონსტიტუციური უფლება გამოიყენა და კანონს ვეტო დაადო, დაასაბუთა, რომ პირველ რიგში ვეტო პოლიტიკური მოტივებით იყო გამოყენებული.
„პოლიტიკური ვეტო იმას არ ნიშნავს, რომ ვეტოს დადების სურვილი გვქონდა. ვეტოში სწორედ ის იგულისხმებოდა, რაც ვენეციის კომისიამაც განსაზღვრა, რომ კანონის მიღების დროს არ იყო საკმარისი განხილვა და ინკლუზიურობა, ასევე პროცესში ჩართულნი არ იყვნენ შესაბამისი არასამთავრობო ორგანიზაციები და პარლამენტმა კანონპროექტი ნაჩქარევად მიიღო. ამ ყველაფერს ვენეციის კომისიამ სამართლებრივი მხარეც დაამატა – კანონით მიყურადების ვადა ხანგრძლივდება, ასევე ადამიანმა საერთოდ შეიძლება, ვერ გაიგოს, რომ მას უსმენდნენ და ა.შ. როდესაც ვეტოს პარლამენტი განიხილავს, უფრო დეტალურად მაშინ ვისაუბრებთ. ეს არის მნიშვნელოვანი კანონი და უნდა შევთანხმდეთ, პრინციპულად რა სჭირდება ქვეყანას. ახლა ვეტოს დაძლევაზე და ხმების რაოდენობაზე არ უნდა იყოს საუბარი. რა თქმა უნდა, ქვეყნის უსაფრთხოება მნიშვნელოვანია, მაგრამ არანაკლებად მნიშვნელოვანია ის, რომ უსაფრთხოებასა და ადამიანის უფლებებს შორის ზღვარი არ უნდა დაიკარგოს. პრეზიდენტმა ვეტოს უფლება სწორედ ამიტომ გამოიყენა. დიდი იმედი მაქვს, რომ უმრავლესობა ვენეციის კომისიის მოსაზრებებს კარგად გაეცნობა და გადაწყვეტილებას ამის შემდეგ მიიღებს“, – განაცხადა მსხილაძემ.
