საქართველოს პარლამენტის ვიცე-სპიკერს ლევან იოსელიანს მიაჩნია, რომ საპარლამენტო ზედამხედველობის გაძლიერების მიზნით, საკანონმდებლო ორგანოში პრემიერ-მინისტრი ხშირად უნდა მიდიოდეს და დეპუტატებს ინფორმაციას უფრო ხშირად უნდა აწვდიდეს.
როგორც ჟურნალისტებს იოსელიანმა განუცხადა, „მინისტრის საათი“ ძალიან არაეფექტური ფორმატია, რადგან მინისტრებს იმის საშუალება აქვთ, რომ კითხვებს გაექცნენ, არ უპასუხონ და კითხვები გამოტოვონ.
„ეს ფორმატი ინტერაქციული უნდა იყოს და დეპუტატს მინისტრისთვის კითხვების დასმა მაშინვე პასუხის მიღება უნდა შეეძლოს. ასევე უნდა გაიზარდოს, როგორც ინტერეპელაციის რაოდენობა, ასევე მისი მოქნილობა იმისთვის, რომ პარლამენტმა რეალურად ის ფუნქცია შეიძინოს, რაც ყველა ქვეყანაში აქვს – აღმასრულებელი ხელისუფლების ეფექტური კონტროლი. მნიშვნელოვანია, პარლამენტში ის მინისტრი მოდიოდეს, ვისი მოსვლაც აქტუალურია კონკრეტული დღის წესრიგიდან გამომდინარე. როცა რეგიონში ომია, მნიშვნელოვანია, პარლამენტში ძალოვანი და საგარეო მინისტრები მოვიდნენ. ამის მოქნილობა რეგლამენტით უნდა იყოს“, – განაცხადა იოსელიანმა.
პარლამენტში, სამუშაო ჯგუფის ფორმატში მსჯელობენ, როგორ უნდა გაძლიერდეს საპარლამენტო ზედამხედველობა და ამ მიმართულებით შესრულდეს ევროკომისიის რეკომენდაცია. დღეს დისკუსიის საგანია – თემატური მოკვლევისა და ნორმატიული აქტების საკითხები.
