ჯანდაცვის სამინისტროს ინფორმაციით, იმუნიზაციის სახელმწიფო პროგრამის ფარგლებში საქართველომ ფრანგული წარმოების, სამკომპონენტიანი სეზონური გრიპის საწინააღმდეგო ვაქცინის 200 000 დოზა შეიძინა.
საუბარია კომპანია SANOFI WINTHROP INDUSTRIE-ის მიერ წარმოებულ Vaxigrip-ზე, რომელიც ჯანდაცვის მსოფლიო ორგანიზაციის მიერ რეკომენდებულ ვაქცინებს შორისაა.
სამინისტროს განმარტებით, ვაქცინა მორგებულია გრიპის იმ შტამებზე, რომელთა გავრცელებაც მიმდინარე სეზონზეა მოსალოდნელი.
უწყება განსაკუთრებულ ყურადღებას ამახვილებს მაღალი რისკის ჯგუფების ვაქცინაციაზე, რადგან მათთვის გრიპის გართულებების განვითარების საფრთხე შედარებით მაღალია.
ვაქცინაცია განსაკუთრებით მნიშვნელოვანია ქრონიკული დაავადებების მქონე პირებისთვის, ონკოლოგიური პაციენტებისთვის, ორსულებისთვის, 60 წლისა და უფროსი ასაკის მოქალაქეებისთვის, სამედიცინო პერსონალისთვის, ასევე თავშესაფრებისა და პანსიონატების ბენეფიციარებისა და თანამშრომლებისთვის.
ჯანდაცვის სამინისტროს ცნობით, გრიპის საწინააღმდეგო აცრა შესაძლებელია 6 თვის ასაკიდან.
ვაქცინაციის მსურველებს შეუძლიათ მიმართონ იმ სამედიცინო დაწესებულებებსა და პოლიკლინიკებს, რომლებიც იმუნიზაციის მომსახურებას ახორციელებენ.
„აცრა ვაქცინაციის სერვისის მიმწოდებელ სამედიცინო დაწესებულებებსა და პოლიკლინიკებში 6 თვის ასაკიდანაა შესაძლებელი და ბენეფიციარებისთვის სრულად უფასოა“, – აღნიშნულია ჯანდაცვის სამინისტროს ინფორმაციაში.
სახელმწიფო პროგრამის ფარგლებში შეძენილი ვაქცინის 200 000 დოზა მოსახლეობის სეზონური გრიპისგან დაცვისა და დაავადების მძიმე მიმდინარეობის რისკის შემცირებისკენაა მიმართული.
