ევროკომისარი: დღეს ევროკავშირის გაფართოებისთვის „სუპერ სამშაბათია“ – უკრაინასთან და მოლდოვასთან მოლაპარაკებების მე-6 კლასტერს ვხსნით

ევროკავშირის გაფართოების საკითხებში ევროკომისრის, მარტა კოსის განცხადებით, დღევანდელი დღე ევროკავშირის გაფართოებისთვის „სუპერ სამშაბათია“, რადგან ევროკავშირი უკრაინასთან და მოლდოვასთან გაწევრიანების მოლაპარაკებების მე-6 კლასტერს ხსნის.

„ორ ათწლეულზე მეტი ხნის განმავლობაში პირველად, ჩვენ გაწევრიანების ოთხ კონფერენციას ერთ დღეს ვმართავთ. ოთხი მოწინავე კანდიდატი – უკრაინა, მოლდოვა, ალბანეთი და მონტენეგრო – წინ მნიშვნელოვან ნაბიჯებს დგამენ. უკრაინასთან და მოლდოვასთან მე-6 კლასტერს ვხსნით, რაც მოიცავს თავდაცვისა და უსაფრთხოების სფეროებს. ასევე, ეს ეხება თავდაცვის სფეროში თანამშრომლობას და ჰიბრიდული საფრთხეების წინააღმდეგ ბრძოლას. ორივე ქვეყანა ევროპული უსაფრთხოების არქიტექტურაში თავის წვლილს შეიტანს“, – განაცხადა მარტა კოსმა ბრიუსელში, ევროკავშირში გაწევრიანების კანდიდატ ქვეყნებთან სამთავრობათშორისო კონფერენციების დაწყებამდე.

მისივე თქმით, უკრაინისა და მოლდოვისთვის მოლაპარაკებების დარჩენილი ოთხი კლასტერის გახსნის ტემპი ევროკავშირის წევრი სახელმწიფოების პოზიციებზეა დამოკიდებული.

„ის, თუ რამდენად სწრაფად შეგვიძლია დარჩენილი ოთხი კლასტერის გახსნა, დამოკიდებულია ევროკავშირის საბჭოს თავმჯდომარეობასა და წევრ სახელმწიფოებზე. მაგრამ, მაშინაც კი, თუ ცოტა ხნით ლოდინი მოგვიწევს, ტექნიკური სამუშაოები კვლავ გრძელდება“, – აღნიშნა კოსმა.

ამასთან, ევროკომისრის ინფორმაციით, მონტენეგრო ევროკავშირში გაწევრიანების მოლაპარაკებების ფარგლებში რამდენიმე მოლაპარაკების თავსაც ხურავს.