„მზად ვარ, შტაბის უფროსად დავუდგე მესამე ცენტრს" - განაცხადა დღეს, 6 მაისს, „სტრატეგია აღმაშენებლის" ლიდერმა, გიორგი ვაშაძემ.
მისი თქმით, მესამე ცენტრში გაერთიანების მსურველი ხალხი ეკონტაქტება.
„იმდენი ხალხი მეკონტაქტება მესამე ცენტრთან დაკავშირებით, მე თვითონ გაოცებული ვარ. ვფიქრობ, ამას აქვს ძალიან, ძალიან დიდი პერსპექტივა. ვინ მეკონტაქტება, ამას დრო გვიჩვენებს",- განაცხადა ვაშაძემ.
კითხვაზე, შეიძლება თუ არა, რომ თბილისის მერობის კანდიდატი იყოს, ვაშაძე აცხადებს, რომ სავარაუდოდ, არა, თუმცა საბოლოო გადაწყვეტილება უნდა შეათანხმოს.
„პოლიტსაბჭოსთან უნდა იყოს განხილული ეს საკითხი, სადაც არის განსხვავებული აზრები, მაგრამ ვფიქრობ, ახლა ის დროა, ცოტა ჩემს პერსონალურ და ჩემი გუნდის როლს ვხედავ იმაში, რომ მაინცდამაინც ჩვენ კი არ ვიყოთ ყველგან, ჩამოვაყალიბოთ კარგი, მძლავრი გაერთიანება. ჩემთვის გამარჯვება არის საქართველოს გამარჯვება და არა პერსონალურად ჩემი გამარჯვება.
პირდაპირ ვამბობ, რომ თუ კარგი გუნდი ჩამოყალიბდა, მე მზად ვარ, ამბიციები უკან გადავწიო და შტაბის უფროსად დავუდგე მესამე ცენტრს, ყველა იმ კანდიდატს, ვინც უნდა მოიგოს საქართველოს მასშტაბით",- განაცხადა ვაშაძემ.
