ზელენსკის ინფორმაციით, რუსეთის შეიარაღებულმა ძალებმა ზაპოროჟიეში საცხოვრებელ შენობებს ხუთი მართვადი საავიაციო ბომბი ესროლეს. თავდასხმის შედეგად, დაღუპულთა გარდა, დაშავდა 14 ადამიანი, რომელთაგან ორის მდგომარეობა კრიტიკულია.
„დღეს რუსეთმა მადლობა გამოხატა დიზელის ექსპორტზე სანქციების მოხსნისთვის ზაპოროჟიეში საცხოვრებელ ბინებზე ხუთი მართვადი საავიაციო ბომბის ჩამოგდებით. ამ მომენტისთვის, სამწუხაროდ, თორმეტი ადამიანი დაიღუპა, მათ შორის სამი ბავშვი. ვუსამძიმრებ მათ ოჯახებსა და ახლობლებს“, – წერს უკრაინის პრეზიდენტი სოციალურ ქსელში.
მისივე განცხადებით, დაშავებულებს სამედიცინო დახმარება უტარდებათ, ხოლო ექიმები კრიტიკულ მდგომარეობაში მყოფი ორი ადამიანის გადარჩენას ცდილობენ.
ზელენსკის შეფასებით, რუსეთის წინააღმდეგ ეკონომიკური ზეწოლის შესუსტება კრემლში აღიქმება სიგნალად, რომ უკრაინის წინააღმდეგ სამხედრო მოქმედებების გაგრძელება შესაძლებელია.
„გასულმა ღამემ კიდევ ერთხელ დაადასტურა, რომ რუსეთში ზეწოლის ნებისმიერ შესუსტებას ისე აღიქვამენ, თითქოს ბრძოლის გაგრძელება და ქალაქებზე ბომბების ჩამოგდების გაგრძელება შეუძლიათ. სხვა სიგნალებია საჭირო“, – აღნიშნავს უკრაინის პრეზიდენტი.
მისი თქმით, რუსეთისთვის ომის გაგრძელებას უფრო მძიმე შედეგები უნდა მოჰყვეს, რათა მოსკოვმა სამხედრო მოქმედებების შეწყვეტის აუცილებლობა გააცნობიეროს.
„რუსეთმა უნდა გაიგოს, რომ ომი უნდა შეწყვიტოს და ეს რომ მოხდეს, რუსეთმა თავისი დანაკარგები უნდა იგრძნოს. ახლა ჩვენი შორი მანძილის საშუალებები უზრუნველყოფენ ამას და რუსეთის დარტყმებს ვუპასუხებთ. მადლობას ვუხდი ყველას, ვინც გვეხმარება“, – აცხადებს ზელენსკი.
უკრაინის პრეზიდენტის განცხადება მოჰყვა აშშ-ის პრეზიდენტ დონალდ ტრამპსა და რუსეთის პრეზიდენტ ვლადიმირ პუტინს შორის რუსული დიზელის საწვავთან დაკავშირებით მიღწეულ შეთანხმებაზე გავრცელებულ ინფორმაციას.
გამოცემა Axios-ის ცნობით, ვაშინგტონმა რუსულ დიზელზე შეზღუდვების მოხსნა მას შემდეგ გადაწყვიტა, რაც უკრაინამ, ტრამპის მოთხოვნის მიუხედავად, რუსეთის ნავთობგადამამუშავებელ ქარხნებზე დარტყმები არ შეწყვიტა.
ზელენსკი მიიჩნევს, რომ რუსეთისთვის სანქციების შემსუბუქება, მაშინ როდესაც მოსკოვი უკრაინის ქალაქებზე თავდასხმებს აგრძელებს, სამშვიდობო ძალისხმევას აზიანებს.
უკრაინის პრეზიდენტმა განცხადება საკუთარ ოფიციალურ გვერდზე გამოაქვეყნა.
