დაიწყო და გრძელდება ახალი ტალღა, რომელიც პოლიტიკოსებს ეხებათ, დროებითი საგამოძიებო კომისია ამისთვის შეიქმნა, - ამის შესახებ საქართველოს მეხუთე პრეზიდენტმა, სალომე ზურაბიშვილმა ბრიფინგზე განაცხადა, რითაც გამოეხმაურა საგამოძიებო კომისიაზე არგამოცხადების გამო პოლიტიკოსების წინააღმდეგ მიმდინარე საქმეებს.
ზურაბიშვილის მტკიცებით, დროებითი საგამოძიებო კომისიის მიზანია, რომ პოლიტიკოსები „დააჯარიმონ ან დაიჭირონ“.
„დაიწყო და გრძელდება ახალი ტალღა, რომელიც პოლიტიკოსებს ეხებათ, დროებითი საგამოძიებო კომისია ამისთვის შეიქმნა. არავინ არ დაიჯეროს, რომ ეს კომისია იმისთვის შეიქმნა, რომ რაღაც სიმართლე, რომელიც 12 თუ მეტი წლის განმავლობაში არ დადგინდა, ახლა დადგინდეს. კომისია შეიქმნა იმისთვის, რომ პოლიტიკოსები დაიბარონ, ის პოლიტიკოსები არ მივიდნენ, (რაც გასაგებია, რატომ არ უნდა მივიდნენ, იმიტომ, რომ არალეგიტიმურია პარლამენტი და მაშასადამე, კომისიაც) და მერე მათ საშუალება მიეცეთ, ისინი დააჯარიმონ, თუ დაიჭირონ. ეს ტალღა დაიწყო და მიმდინარეობს. ეს არის ახალი რეპრესიების ერთ-ერთი ფორმა”, - განაცხადა ზურაბიშვილმა.
გარდა ამისა, სალომე ზურაბიშვილი ბრიფინგზე საქართველოს პარლამენტის მიერ დიპლომატიურ სამსახურში დაგეგმილი ცვლილებების პროექტის დამტკიცებას გამოეხმაურა და აღნიშნა, რომ ახალი კანონი ემსახურება „ქართული ოცნების“ ტოტალურ კონტროლს დიპლომატებზე“.
„დიპლომატიური სამსახურის ზოგიერთ მეთაურს პარლამენტში სამარცხვინო სხდომა და გამოსვლები [ჰქონდა], რომლებმაც ახალი კანონი წარადგინეს, რომელიც რეალურად დიპლომატებზე, ჩვენს ელჩებზე საზღვარგარეთ, „ქართული ოცნების” ტოტალურ კონტროლს აწესებს. კერძოდ, თუ მათ ჩვენს საგარეო კურსს გადაუხვიეს, შეუძლიათ, ნებისმიერ დროს როტაციის მიუხედავად, მოხსნან.
ალბათ, საჭიროა, რომ დღეს ყველა მოხსნან, რადგან დღეს, ყველას გადახვეული აქვს იმ კურსისთვის, რომელიც ჩვენს კონსტიტუციაში ასახულია. ეს კონსტიტუცია ჯერ შეცვლილი არ არის და ყველა არაკონსტიტუციურად იქცევა, ვინც მიჰყვება „ქართული ოცნების” ინსტრუქციებს სხვადასხვა დედაქალაქში, სადაც ისინი წარმოდგენილები არიან”, - განაცხადა ზურაბიშვილმა.
