„ერთიანობა ნაციონალური მოძრაობის“ დელეგაცია ვაშინგტონში ოფიციალურ ვიზიტს აგრძელებს.
პარტიის პრესსამსახურის ცნობით, დელეგაციამ ვიზიტის მეორე დღეს სენატში მაღალი დონის შეხვედრები გამართა.
„პარტიის ლიდერებმა შეხვედრა გამართეს სენატორ თომ ტილისის, სენატორ ტედ ბადის ოფისებთან და სენატის საგარეო ურთიერთობების კომიტეტთან. ორმხრივი შეხვედრის განხილვის მთავარი თემა იყო „MEGOBARI აქტის“ წარმომადგენელთა პალატაში მიღება და მისი მომდევნო ეტაპი სენატში. ენმ-ის დელეგაციამ მოუწოდა სენატორებს, რომ დაჩქარებული რეჟიმით განიხილონ და დაამტკიცონ აღნიშნული კანონი, რომელიც საქართველოს მოსახლეობისადმი ამ კრიტიკულ დროს ძლიერ ორპარტიულ მხარდაჭერას გამოხატავს. თინა ბოკუჩავა აცხადებს, რომ „MEGOBARI აქტის“ სენატში სწრაფად მიღება სასიცოცხლოდ მნიშვნელოვანია, როგორც სიმბოლური, ასევე პრაქტიკული მხარდაჭერისთვის. მისი თქმით, აშშ დემოკრატიისთვის ბრძოლაში საქართველოს გვერდით დგას. დელეგაციის წევრებმა სენატის ლიდერებს საქართველოს მოსანახულებლად მოწვევა გადასცეს, რაც კიდევ უფრო გაამყარებს კავშირებს აშშ-ს და ქართველ ხალხს შორის და იქნება სოლიდარობის გამოხატულება ხალხის მიმართ, რომლებიც თავისუფლებისა და ევროპული არჩევანის დასაცავად იბრძვიან. როგორც პარტიის ლიდერები აცხადებენ, მნიშვნელოვანია როგორც დემოკრატების, ისე რესპუბლიკელების მკაფიო და ერთიანი ხმა. ვიზიტი მთელი კვირის განმავლობაში გაგრძელდება და მოიცავს დამატებით შეხვედრებს კონგრესის ლიდერებთან, ამერიკის ოფიციალურ პირებთან და სამოქალაქო საზოგადოების წარმომადგენლებთან“, - აღნიშნულია „ერთიანობა ნაციონალური მოძრაობის“ მიერ გავრცელებულ ინფორმაციაში.
