სალომე ზურაბიშვილი ოპოზიციური პარტიის წარმომადგენლებს შეხვდა
17.04.2025 ნახვები: 265
საქართველოს მეხუთე პრეზიდენტი სალომე ზურაბიშვილი ოპოზიციას შეხვდა. ოპოზიციონერი პოლიტიკოსები ამბობენ, რომ შეხვედრაზე მიმდინარე საკითხები და წინააღმდეგობის პლატფორმის გეგმები განიხილეს.
მათი განცხადებით, განსახილველ საკითხთა შორის იყო რეპრესიები, რომელიც, მათივე თქმით, ამ შემთხვევაში ვასო აბაშიძის სახელობის მუსიკისა და დრამის თეატრის ხელმძღვანელს, დავით დოიაშვილს შეეხო.
ოპოზიციონერი პოლიტიკოსები ასევე ამბობენ, რომ შეხვედრაზე 2025 წლის თვითმმართველობის არჩევნებზე საუბარი არ ყოფილა.
„განვიხილეთ მიმდინარე საკითხები, წინააღმდეგობის პლატფორმის გეგმები. საზოგადოებას შევთავაზებთ შეხვედრებს და გაგაცნობთ, როცა იქნება კონკრეტული თარიღი. თვითმმართველობის არჩევნები არ არის ჩვენი განხილვის საკითხი,“ - განაცხადა კოალიცია „ძლიერი საქართველოს“ ერთ-ერთმა ლიდერმა, ბადრი ჯაფარიძემ „ფორმულასთან“ საუბრისას.
„დღეს, ბუნებრივია, თეატრის და რეპრესიების თემაზე ვისაუბრეთ. საერთო სოლიდარობის მხარდაჭერის ფორმებზე და საგარეო საკითხებზე. ეს არის მიმდინარე, ყოველდღიური საკითხები,“ - აღნიშნა „კოალიცია ცვლილებისთვის“ ერთ-ერთმა ლიდერმა, ელენე ხოშტარიამ „ფორმულასთან“.
