რას გამოიწვევს EQAR-ის გადაწყვეტილება?! - ლაშა მარგიშვილის კომენტარი

EQAR-ის გადაწყვეტილებას არანაირი გავლენა არ აქვს დიპლომების აღიარების ან კვალიფიკაციების აღიარების საკითხთან, – ამის შესახებ განათლების ხარისხის განვითარების ეროვნული ცენტრის დირექტორის მოვალეობის შემსრულებელმა, ლაშა მარგიშვილმა ბრიფინგზე განაცხადა.

მისი განმარტებით, როგორც 2019 წლამდე იყო საქართველოში გაცემული დიპლომები აღიარებული საერთაშორისო დონეზე, კვლავ იმგვარად იქნება აღიარებული ჩვენი დიპლომები.

„გვსურს, საზოგადოებას მივაწოდოთ ინფორმაცია განათლების ხარისხის განვითარების ეროვნული ცენტრისთვის EQAR-ში რეგისტრაციის შეჩერებასთან დაკავშირებით. მინდა, დავამშვიდო საზოგადოება, სტუდენტები, აკადემიური სფეროს წარმომადგენლები, რომ აღნიშნულ გადაწყვეტილებას არანაირად არ უკავშირდება საქართველოში გაცემული დიპლომების კვალიფიკაციების აღიარების საკითხი. განათლების ხარისხის განვითარების ეროვნული ცენტრი წარმოადგენს ევროპული ხარისხის უზრუნველყოფის სააგენტოების რეესტრის, იგივე EQAR-ის წევრ ორგანიზაციას 2019 წლიდან, ასევე 2019 წელს ცენტრი გახდა ევროპული ასოციაციის ENQA-ს წევრი. 2023 წელს განათლების ხარისხის განვითარების ეროვნულმა ცენტრმა გაიარა მორიგი შეფასება ჩვენი საერთაშორისო პარტნიორების. 11 სტანდარტთან მიმართებით ENQA-ს ექსპერტთა დასკვნის მიხედვით ცენტრი შეფასდა როგორც სრულად შესაბამისობაშია მოთხოვნებთან, ორ სტანდარტთან მიმართებით, ეს ეხება ცენტრის დამოუკიდებლობას, მეორე ეხება ავტორიზაციის და აკრედიტაციის საბჭოების საქმიანობას, საერთაშორისო პარტნიორებმა შეგვაფასეს როგორც ნაწილობრივ შესაბამისი, თუმცა ამის შემდგომ უკვე ENQA-ს შეფასების კომიტეტმა და EQAR-მა მიიღეს გადაწყვეტილება, რომ ერთ-ერთ სტანდარტში დამოუკიდებლობის ნაწილში ცენტრი შეფასებულიყო, როგორც არ არის შესაბამისობაში მოთხოვნებთან. აღნიშნულ გადაწყვეტილებას არანაირი გავლენა არ აქვს დიპლომების აღიარების ან კვალიფიკაციების აღიარების საკითხთან. როგორც 2019 წლამდე იყო საქართველოში გაცემული დიპლომები აღიარებული საერთაშორისო დონეზე, როგორც ევროკავშირის წევრ სახელმწიფოებში ასევე ნებისმიერ სხვა სახელმწიფოში, იმგვარად იქნება აღიარებული კვლავ ჩვენი დიპლომები“, – აღნიშნა ლაშა მარგიშვილმა.

მისივე თქმით, აღნიშნული გადაწყვეტილება ასევე არ ეხება გაცვლითი პროგრამების გაუქმებას ან საერთაშორისო გრანტების შეჩერებას.

„გუშინ ასევე გავრცელდა ინფორმაცია სოციალური მედიის საშუალებით, რომ EQAR-ის გადაწყვეტილება, თურმე რაიმენაირად უკავშირდება საერთაშორისო ერთობლივი გაცვლითი პროგრამების გაუქმებას, ბოლონიის პროცესში საქართველოს წევრობის შეჩერებას, ასევე კერძო უნივერსიტეტების გაუქმებას, საერთაშორისო გრანტების შეჩერებას. ესეც არ არის სწორი ინფორმაცია. არანაირად და არცერთ ამ ჩამოთვლილ და რაც ასე ვთქვათ, განცხადებაში იყო მითითებული საკითხები, არცერთ ამ პუნქტს არ პასუხობს და არანაირად არ უკავშირდება ცენტრისთვის EQAR-ში რეგისტრაციის შეჩერება“, – განაცხადა ამის შესახებ ლაშა მარგიშვილმა განაცხადა.

ამასთან, ლაშა მარგიშვილის განცხადებით, განათლების ხარისხის განვითარების ეროვნულ ცენტრი EQAR-ის გადაწყვეტილების გასაჩივრებას გეგმავს.

„ჩვენ, განათლების ხარისხის განვითარების ეროვნულ ცენტრში მივიღეთ გადაწყვეტილება და ვგეგმავთ აღნიშნული გადაწყვეტილების გასაჩივრებას. ამისთვის ჩვენს ორგანიზაციას აქვს 20-დღიანი ვადა და შემდეგ უკვე ჩვენი საერთაშორისო პარტნიორები 60 დღის ვადაში განიხილავენ ჩვენს საჩივარს. დაველოდებით სააპელაციო კომიტეტის გადაწყვეტილებას და ვიმოქმედებთ ამ გადაწყვეტილების შესაბამისად. თუკი სააპელაციო კომიტეტი არ გაითვალისწინებს ჩვენს არგუმენტებს, რომლებსაც ვაპირებთ, რომ წარვუდგინოთ მათ ამის შემდგომ უკვე მოვითხოვთ EQAR-სგან დამატებითი შეფასების განხორციელებას. მნიშვნელოვანია აღინიშნოს ისიც, რომ გარკვეული რეკომენდაციები, რაც ჰქონდათ EQAR-ის წარმომადგენლებს ამ რეკომენდაციების დიდი ნაწილი უკვე ჩვენს მიერ არის გამოსწორებული. შესაბამისი საკანონმდებლო ცვლილებები განხორციელდა 2024 წლის ზაფხულის პერიოდში, თუმცა რჩება გარკვეული საკითხები, რომლებზეც ვაგრძელებთ ჩვენ საერთაშორისო პარტნიორებთან მჭიდრო თანამშრომლობის ფორმატში მუშაობას და აუცილებლად უზრუნველვყოფთ, რომ EQAR-ის რეგისტრაცია ცენტრს რაც შეიძლება მალე აღუდგეს.

რაც შეეხება ENQA-ს ასოციაციას, ასოციაციის წევრობა ცენტრს არ შეჩერებია, 21 დეკემბრის მდგომარეობით ჩვენ ვართ კვლავ ENQA-ს სრული წევრი ორგანიზაცია და მისი პროცედურების მიხედვით, თუკი მათი წევრი ორგანიზაცია, რომელიმე სტანდარტს ვერ აკმაყოფილებს, ისინი არ უწყვეტენ ამ ორგანიზაციას ასოციაციის წევრობას, მას აძლევენ დამატებით ორ წლიან ვადას, რომ გამოასწოროს რეკომენდაციები. შესაბამისად გააგრძელოს ასოციაციის წევრობა. შესაბამისად, კიდევ ერთხელ ხაზგასმით მინდა აღვნიშნო, რომ ENQA-ში რეგისტრაციის შეჩერება საქართველოში გაცემული კვალიფიკაციების დიპლომების აღიარებას არანაირად არ უკავშირდება. ასევე ეს არ უკავშირდება სამედიცინო განათლების ხარისხის უზრუნველყოფის საკითხებს. იცით, რომ ჩვენი ორგანიზაცია 2018 წლიდან არის სამედიცინო განათლების მსოფლიო ფედერაციის წევრი ორგანიზაცია და შესაბამისად, ჩვენ მანამდე მოვიპოვეთ ამ ორგანიზაციის წევრობა, ვიდრე გავხდებოდით ENQA-ს და EQAR-ის წევრი ორგანიზაცია. აქედან გამომდინარე, არც სამედიცინო განათლების მიმართულებით არ შეიძლება, ვთქვათ, რომ რაიმე ტიპის პრობლემა, დაბრკოლება შეიძლება, შეექმნათ ჩვენს ადგილობრივ თუ საერთაშორისო სტუდენტებს, რომლებიც სწავლობენ მედიცინის პროგრამებზე“, – განაცხადა ლაშა მარგიშვილმა.