საქართველოს მმართველი პარტია „ქართული ოცნება“, ავტორიტარული, პრორუსული ჯგუფი, იმუქრება, რომ 26 ოქტომბრის საპარლამენტო არჩევნებში უმრავლესობას მოიპოვებს, აკრძალავს ყველა ოპოზიციურ პარტიას. ეს შეიძლება იყოს საქართველოს დემოკრატიისთვის უკანასკნელი მოწოდება, - ამის შესახებ საუბარია The Washington Post-ის სტატიაში: „უკანასკნელი მოწოდება საქართველოს დემოკრატიისთვის“.
„პოლიტიკურ ჯგუფებს შორის თავისუფალი კონკურენციის გარეშე დემოკრატია ვერ იარსებებს. სწორედ ამიტომაა სამხრეთ კავკასიის რეგიონის ქვეყნიდან, საქართველოდან მიღებული ბოლო ცნობები ასე საგანგაშო. მმართველი პარტია „ქართული ოცნება“, ავტორიტარული, პრორუსული ჯგუფი, იმუქრება, რომ 26 ოქტომბრის საპარლამენტო არჩევნებში უმრავლესობას მოიპოვებს, აკრძალავს ყველა ოპოზიციურ პარტიას. ეს შეიძლება იყოს საქართველოს დემოკრატიისთვის უკანასკნელი მოწოდება. შეერთებულ შტატებს მეტის გაკეთება შეუძლია მის გადასარჩენად“, - აღნიშნულია სტატიაში.
ავტორი ხაზს უსვამს, რომ რაც საქართველოს განსაკუთრებულ მნიშვნელობას ანიჭებს ყოფილ საბჭოთა რესპუბლიკებს შორის არის ის, რომ მოსახლეობის დიდი ნაწილი რჩება დემოკრატიული მომავლის ერთგული ევროპასთან კავშირებით, „ქართული ოცნების“ რუსეთთან კავშირში ყოფნის მიუხედავად.
„საქართველოს სახელმწიფოს მეთაურმა, პრეზიდენტმა სალომე ზურაბიშვილმა, რომელიც მცირე ლიბერალური პარტიიდან მოდის და „ქართული ოცნების“ მიმართ კრიტიკულადაა განწყობილი, გასულ თვეში გამოსვლაში პირდაპირ თქვა, რომ არჩევნები „ეგზისტენციალურია“. „არჩევანი იქნება რუსეთის მონობასა და ევროპასთან თანამშრომლობას შორის“, – განაცხადა ქალბატონმა ზურაბიშვილმა“, - აღნიშნულია სტატიაში.
ავტორი „უცხოური გავლენის გამჭვირვალობის შესახებ“ კანონზეც საუბრობს და აცხადებს, რომ სხვა რეპრესიულ ქვეყნებში მსგავს კანონებს იყენებენ სამოქალაქო საზოგადოების ჯგუფების სტიგმატიზაციისა და მათი დაფინანსების ჩასახშობად.
„როდესაც პარტია „ქართულმა ოცნებამ“ სცადა გაეტარებინა რეპრესიული „უცხოური აგენტების“ შესახებ კანონი ამ წლის დასაწყისში, რომელიც შეიქმნა რუსეთის პრეზიდენტის ვლადიმერ პუტინის მიერ შემუშავებული კანონმდებლობის მიხედვით, საქართველოს მოქალაქეები გამოვიდნენ ქუჩებში რომ გაეპროტესტებინათ ის, რასაც „რუსულ კანონს“ უწოდებდნენ და ხალხს წინ ახალგაზრდები მიუძღოდნენ. საბოლოოდ „ქართულმა ოცნებამ“ გაიმარჯვა, საპრეზიდენტო ვეტო გადალახა და კანონმდებლობა ძალაში შევიდა. სხვა რეპრესიულ ქვეყნებში მსგავს კანონებს იყენებენ სამოქალაქო საზოგადოების ჯგუფების სტიგმატიზაციისა და მათი დაფინანსების ჩასახშობად. ევროკავშირმა და შეერთებულმა შტატებმა გააფრთხილეს, რომ კანონი სერიოზულ დაბრკოლებას უქმნის საქართველოს ევროკავშირსა და ნატო-ში გაწევრიანებას, რაც უდავოდ, არის ერთ-ერთი მიზეზი, რის გამოც „ქართული ოცნება“ და მისი რუსი მხარდამჭერები მხარს უჭერენ მას“, - აღნიშნულია სტატიაში.
სტატიის ავტორი იხსენებს, რომ პრემიერ-მინისტრი ირაკლი კობახიძე ცალსახად დაიმუქრა გასულ თვეში, რომ გააუქმებს მთავარ ოპოზიციურ პარტიებსა და კოალიციებს, თუ „ქართული ოცნება“ 150-კაციან პარლამენტში მინიმუმ 113 მანდატს მოიგებს.
"სინამდვილეში, ეს ყველაფერი ერთი პოლიტიკური ძალაა“, - განაცხადა მან ოპოზიციურ პარტიებსა და კოალიციებზე, მათ შორის „ერთიანი ნაციონალური მოძრაობის“ შესახებ, რომელიც დააარსა საქართველოს ყოფილმა პრეზიდენტმა მიხეილ სააკაშვილმა, რომელიც დღევანდელმა რეჟიმმა დააპატიმრა პოლიტიკურად მოტივირებული ბრალდებით. პრემიერ-მინისტრის ბოლო კომენტარები კატეგორიულად მიუთითებს იმაზე, რომ „ქართული ოცნება“ ემზადება ოპოზიციის გასანადგურებლად. ბატონმა კობახიძემ ცალსახად არ თქვა, როგორ განხორციელდება ეს, მაგრამ განაცხადა, რომ „მმართველი პარტია“ დაამტკიცებს, რომ ოპოზიციამ, სააკაშვილის მეთაურობით, დანაშაულებრივი პროვოცირება მოახდინა რუსეთის 2008 წლის შეჭრაში. ეს აბსურდია: რუსეთი შეიჭრა საქართველოში და დღემდე ოკუპირებული აქვს მისი ტერიტორიის 20 პროცენტი. „შესაძლებელია პროკურატურამ დაიწყოს კონკრეტული გამოძიება, რომელიც შეიძლება ჩვენ დავაინიციროთ, ან საპარლამენტო კომისია შეიქმნას“, - განაცხადა პრემიერმა და დასძინა, რომ ეს გამოიწვევს ოპოზიციის წევრების პარლამენტიდან გაძევებას“, - აღნიშნულია სტატიაში.
სტატიის ავტორი ასევე წერს, რომ ბიძინა ივანიშვილმა, რომელიც საქართველოს ყოფილი პრემიერია და რომელიც „ქართული ოცნების“ უკან დგას, არაერთხელ უწოდა ოპოზიციას ჩრდილოვანი გლობალური შეთქმულების ფრონტი, რომლის მიზანი საქართველოს ხელში ჩაგდებაა. სტატიის ავტორის შეფასებით, ეს იმეორებს პუტინის პარანოიდულ გაფრთხილებებს დასავლეთის მიერ შთაგონებული „ფერადი რევოლუციების“ შესახებ.
„გამოკითხვები აჩვენებს, რომ ქართველების თითქმის ორი მესამედი თვლის, რომ ქვეყანა არასწორ გზაზე დგას და რომ დროა შეიცვალოს ქართული ოცნების მმართველობა. განწყობა განსაკუთრებით მძაფრია ახალგაზრდებში. 31 ივლისს სახელმწიფო დეპარტამენტმა გამოაცხადა, რომ აპაუზებს საქართველოს მთავრობის პირდაპირ დაფინანსებას 95 მილიონი აშშ დოლარის ოდენობით „ანტიდემოკრატიული ქმედებებისა და ცრუ განცხადებების“ გასაპროტესტებლად. ევროკავშირში საქართველოს გაწევრიანებას ქვეყნის შიგნით ძლიერი მხარდაჭერა აქვს, მაგრამ ევროკავშირმა შეაჩერა პროცესი დემოკრატიის უკანსვლის საპასუხოდ. ეს არის ჭკვიანი, გაზომილი სანქციები „ქართული ოცნების“ ავტორიტარული ტენდენციების საპასუხოდ. შეერთებულმა შტატებმა უნდა გამოიყენოს დრო არჩევნებამდე, რათა ხმა აიმაღლოს თავისუფალი და სამართლიანი კენჭისყრის დასაცავად, ხმების სამართლიანი დათვლისა და შედეგების პატივისცემის დასაცავად. საქართველოს მოქალაქეებმა უნდა მოისმინონ პრეზიდენტ ჯო ბაიდენისა და კონგრესისგან, რომ ისინი არ დაუშვებენ ერთპარტიულ სახელმწიფოს საქართველოში. თუ შეერთებული შტატები სიტუაციას რბილი უგულებელყოფით განიხილავს, დემოკრატია შესაძლოა მოკვდეს პოსტსაბჭოთა სამყაროს კიდევ ერთ პოლიტიკურად პერსპექტიულ კუთხეში“, - აღნიშნულია სტატიაში.
IPN
