ინდოეთის პრემიერ-მინისტრი ნარენდრა მოდიაცხადებს, რომ რუსეთსა და უკრაინას შორის შუამავლობისთვის მზად არის. აღნიშნულის შესახებ ინდოეთის მთავრობის მეთაურმა ვარშავაში, პოლონეთის პრემიერ-მინისტრთან შეხვედრისას განაცხადა.
„ჩვენ მხარს ვუჭერთ დიალოგსა და დიპლომატიას, მშვიდობისა და სტაბილურობის რაც შეიძლება სწრაფად აღდგენას. ინდოეთი მზადაა, ამაში წვლილი შეიტანოს მეგობრულ ქვეყნებთან ერთად“, – განაცხადა ნარენდრა მოდიმ.
მისივე თქმით, ინდოეთს მტკიცედ სწამს, რომ ვერცერთი პრობლემა ვერ გადაწყდება ბრძოლის ველზე.
თავის მხრივ, პოლონეთის პრემიერის, დონალდ ტუსკის განცხადებით, „ინდოეთის პრემიერ-მინისტრმა დაადასტურა მზადყოფნა, პირადად იმუშაოს ომის მშვიდობიან, სამართლიან და სწრაფ დასრულებაზე“.
„დარწმუნებული ვართ, ინდოეთს შეუძლია, ამაში ძალიან მნიშვნელოვანი როლი ითამაშოს“, – განაცხადა ტუსკმა.
ამასთან, პოლონეთის პრემიერ-მინისტრმა ისაუბრა უკრაინის უფლებაზე, დაიცვას საკუთარი საზღვრები.
„ისტორიამ ასწავლა ჩვენს ხალხებს, რამდენად მნიშვნელოვანია წესების პატივისცემა და საზღვრების, ტერიტორიული მთლიანობის დაცვა“, – განაცხადა პოლონეთის მთავრობის მეთაურმა.
ცნობისთვის, ინდოეთის პრემიერი ნარენდრა მოდი პოლონეთში უკრაინაში ვიზიტის წინ ჩავიდა. ნარენდრა მოდი უკრაინაში ვიზიტს 23 აგვისტოსთვის გეგმავს. ეს იქნება ინდოეთის ლიდერის პირველი ვიზიტი უკრაინაში გასული 30 წლის განმავლობაში. მანამდე, რამდენიმე კვირის წინ ინდოეთის პრემიერი მოსკოვში იმყოფებოდა, სადაც ვლადიმერ პუტინს შეხვდა. უკრაინის პრეზიდენტმა ნარენდრა მოდის რუსეთში ვიზიტი „იმედგაცრუებად“ შეაფასა.
