ევროკავშირის სადამკვირვებლო მისიის ახალი ხელმძღვანელი ბეტინა პატრისია ბუგანი საქართველოში მოვალეობის შესრულებას შეუდგა.
ევროკავშირის სადამკვირვებლო მისიის ინფორმაციით, ბუგანი თბილისში 6 აპრილს ჩამოვიდა.
„მე მოხარული ვარ, მქონდეს პატივი, დავიწყო ჩემი საქმიანობა როგორც ევროკავშირის სადამკვირვებლო მისიის ხელმძღვანელმა. ჩემი პროფესიული კარიერის 35-ზე მეტი წლის განმავლობაში მამოძრავებდა უსაფრთხოების, მშვიდობისა და სტაბილურობის ხელშეწყობის მიმართ ერთგულება. პატივი იქნება 300-ზე მეტი მოწადინებული თანამშრომლისგან შემდგარი გუნდის გაძღოლა, რომლებსაც 24/7 მტკიცე შრომით წვლილი შეაქვთ საქართველოში სტაბილურობასა და უსაფრთხოებაში. ვიმედოვნებ, რომ ჩემი ხელმძღვანელობა დაეხმარება მათ ამ მნიშვნელოვან მისიაში, რომელიც დახმარებას უწევს კონფლიქტით დაზარალებული მოსახლეობის ყოველდღიური ცხოვრების გაუმჯობესებას და თემებს შორის ნდობის აღდგენას,“ – განაცხადა მისიის ხელმძღვანელმა საქართველოში ჩამოსვლისას.
ბეტინა ბუგანი ხელმძღვანელის პოზიციაზე ევროკავშირის საბჭოს მიერ 2024 წლის 26 მარტს დაინიშნა და უფლებამოსილების შესრულებას 2024 წლის პირველ აპრილს შეუდგა.
ევროკავშირის სადამკვირვებლო მისიის ცნობით, ბეტინა პატრისია ბუგანი არის საფრანგეთის ეროვნული ჟანდარმერიის ოფიცერი და აქვს დიდი გამოცდილება ხელმძღვანელ თანამდებობებსა და საერთაშორისო ურთიერთობებში. მას ეკავა სხვადასხვა ხელმძღვანელი თანამდებობა გაერთიანებული ერების ორგანიზაციასა და საფრანგეთის შინაგან საქმეთა სამინისტროში/ფრანგულ ჟანდარმერიაში. მანამდე ჩართული იყო სამშვიდობო საქმიანობაში, იყო პოლიციის კომისარი MINUSMA-ში (გაერო-ს მრავალგანზომილებიანი ინტეგრირებული სტაბილიზაციის მისია მალიში).
