სააპელაციო სასამართლომ თამარ ზაალიშვილის სარჩელზე „ტვ პირველის“ გამამტყუნებელი გადაწყვეტილება ძალაში დატოვა.
თამარ ზაალიშვილი ტელეკომპანია „ტვ პირველს“ არასწორი ინფორმაციის გავრცელებას ედავება. ზაალიშვილი ტელეკომპანიისგან, კომპენსაციის სახით, სიმბოლურად, 5 555 ლარს, პროდიუსერისა და ჟურნალისტისგან, ნოდარ მელაძისა და მაკა ჩიხლაძისგან კი 5-5 ლარს ითხოვდა.
როგორც თამარ ზაალიშვილმა ჟურნალისტებს განუცხადა, სააპელაციო სასამართლომ სამართლიანი გადაწყვეტილება მიიღო.
„სააპელაციო სასამართლომ ძალაში დატოვა თბილისის საქალაქო სასამართლოს გადაწყვეტილება, რითიც, ვფიქრობ, აღსრულდა სამართალი. თბილისის საქალაქო სასამართლოს პირველად სარჩელი წარედგინა სიტყვისა და გამოხატვის თავისუფლების შესახებ საქართველოს კანონის მეცხრამეტე მუხლის შესაბამისად, კანონი საჯაროა და შეგიძლიათ, გაეცნოთ მეცხრამეტე მუხლს. სასამართლომ მიიღო იურიდიულად დასაბუთებული გადაწყვეტილება. გადაწყვეტილებაში აბსოლუტურად გამორიცხულია პოლიტიკური მდგენელი. იურიდიულად დასაბუთებული გადაწყვეტილება დაეყრდნო საქმეში წარმოდგენილ უტყუარ მტკიცებულებებს, რომლებიც წარმოდგენილი იყო უშუალოდ ჩემ მიერ. ეს მტკიცებულებები, ჩემი შუამდგომლობის საფუძველზე, მოთხოვნილ იქნა ყველა იმ ინსტიტუციიდან, რომელსაც შეიძლება, რაიმე შეხება ჰქონოდა თეატრისა და კინოს სახელმწიფო უნივერსიტეტის დიპლომების ნამდვილობის დადასტურებასთან. შესაბამისად, სასამართლომ სწორედ ამ უტყუარ მტკიცებულებებსა და ჩვენებებზე დაყრდნობით მიიღო შესაბამისი გადაწყვეტილება. სასამართლომ გამოიყენა კანონი, რომელიც უნდა გამოეყენებინა და სწორად განმარტა კანონი“, – განაცხადა თამარ ზაალიშვილმა.
შეგახსენებთ, სიუჟეტი, რომლის შინაარსზეც თამარ ზაალიშვილი დავობს, ტელეკომპანია „პირველის“ ეთერში 2021 წლის ივლისში გავიდა.
