სამხედრო ტყვეების საკითხი არის უკრაინის საქმე გამომდინარე იქიდან, რომ ისინი არიან რუსეთ-უკრაინის ომის სამხედრო ტყვეები, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა, რითაც უკრაინაში მებრძოლი საქართველოს ორი მოქალაქის რუსეთის შეიარაღებული ძალების მიერ ტყვედ აყვანასთან დაკაშირებით დასმულ კითხვას უპასუხა.
კობახიძის თქმით, უკრაინულ მხარესთან ამ თემაზე ვერ ითანამშრომლებენ.
„ეს არის სენსიტიური საკითხი და აქედან გამომდინარე, ბევრ საკითხზე შეიძლება, საჯაროდ ვერც ვისაუბროთ. ამ შემთხვევაში, როგორც სამხედრო ტყვეებზე ჩვენ ვერ ვიზრუნებთ, რადგან ისინი არიან რუსეთ-უკრაინის ომის სამხედრო ტყვეები, მაგრამ ჩვენი კონსტიტუციური ვალდებულებაა, ვიზრუნოთ მოქალაქეებზე. ამისთვის არსებობს შესაბამისი მექანიზმები. დანარჩენი არის მგრძნობიარე საკითხი, შესაბამისი უწყებების მიერ დასარეგულირებელი და რაიმე პასუხი თუ იქნება გასაცემი, შესაბამისი უწყებები გაგცემენ, თუნდაც მოკითხვასთან დაკავშირებით. ჩემი პრეროგატივა არ არის ამ კითხვებზე პასუხის გაცემა. ყველაფერთან დაკავშირებით პასუხს გაგცემენ შესაბამისი უწყებები. ისინიც ღია არიან პასუხებისთვის. თუ არ გცემენ პასუხს, შეიძლება, ესეც იყოს მნიშვნელოვანი, რომ ამ თემასთან დაკავშირებით საჯაროდ არ გაავრცელონ ინფორმაცია.
ჩვენ უკრაინულ მხარესთან ამ თემაზე ვერ ვითანამშრომლებთ. ჩვენ შეგვიძლია, გამოვიყენოთ კონკრეტული არხები იმისთვის, რომ ვიზრუნოთ ჩვენი მოქალაქეების ინტერესების დაცვაზე. რაც შეეხება სამხედრო ტყვეების საკითხს, სამხედრო ტყვეების საკითხი არის უკრაინის საქმე გამომდინარე იქიდან, რომ ისინი არიან რუსეთ-უკრაინის ომის სამხედრო ტყვეები. ასეთია რეალობა, შესაბამისად გაგრძელდება ზრუნვა იმ კონსტიტუციურო ვალდებულების ფარგლებში, რაც დაკავშირებულია მოქალაქის მიმართ პასუხისმგებლობასთან“, – განაცხადა კობახიძემ.
