„ნებისმიერი აქცია კანონის ჩარჩოში უნდა ჩაჯდეს", - განაცხადა დღეს, 15 ნოემბერს, პარტია „საქართველოსთვის" ერთ-ერთმა წევრმა, ანა ბუჩუკურმა „ნაციონალური მოძრაობის" მიერ ორგანიზებულ აქციებზე საუბრისას განაცხადა.
შეგახსენებთ: საქართველოს მესამე პრეზიდენტის, მიხეილ სააკაშვილის გლდანის ციხიდან მრავალპროფილურ კლინიკაში გადაყვანის მოთხოვნით, ოპოზიცია კვირაზე მეტია, აქციებს მართავს. აქცია დღესაც გაიმართება და, როგორც ენმ-ს ლიდერმა, ნიკა მელიამ განაცხადა, მარჯვენა და მარცხენა სანაპიროები გადაიკეტება.
ბუჩუკური, ოპოზიციის თანმიმდევრულობას უარყოფითად აფასებს და ამბობს, რომ არათანმიმდევრული ქმედებები ხელისუფლებას აძლიერებს.
„როცა კანონის ფარგლებში არ ჯდება, ხელს აძლევს ხელისუფლებას. ჩვენი პარტიული სტრატეგიაა, რომ ტრიბუნები გამოვიყენოთ, მათ შორის საკანონმდებლო, მაგრამ ოპოზიციის გადასაწყვეტია, სტრატეგია რა იქნება. შეიძლება, ჩემი პირადი პოზიცია მათ გადაწყვეტილებას არ ემთხვეოდეს. ნებისმიერი აქცია კანონის ჩარჩოში უნდა ჩაჯდეს. ოპოზიციის ნაწილის არათანმიმდევრულობას დადებითად ვერ შევაფასებ, რადგან არათანმიმდევრული ქმედებები მხოლოდ ხელისუფლებას აძლიერებს", - განაცხადა ბუჩუკურმა.
