განვაგრძობთ ჩვენს პარტნიორებთან კონსოლიდაციას, რათა უკრაინის საჰაერო თავდაცვა მაქსიმალურად ეფექტური გავხადოთ, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიური მიმართვისას განაცხადა.
მისივე თქმით, რუსული ტერორის დამარცხება გულისხმობს უკრაინის გრძელვადიან უსაფრთხოებას.
„რუსული ტერორი უნდა დამარცხდეს ყოველდღე და ყოველ ღამეს უკრაინის ყველა რეგიონში, ყველა უკრაინული ქალაქისა და სოფლის ცაზე. როდესაც რუსი ტერორისტების ნებისმიერი თავდასხმა წარუმატებლად დასრულდება ტერორისტებისთვის, მათი დამარცხება გახდება ჩვენი გრძელვადიანი უსაფრთხოების წყარო. ახლა უკრაინაში, ჩვენს მიწაზე, ჩვენს ცაზე წყდება, თავისუფლება და ცივილიზაცია შეინარჩუნებს თუ არა გლობალურ ლიდერობას ამ საუკუნეში. ჩვენ ეს გადავწყვიტეთ ამერიკასთან ერთად, ევროპასთან ერთად, ყველა ჩვენს მოკავშირესა და პარტნიორთან ერთად. მადლობას ვუხდი ყველას მსოფლიოში, ვინც გვეხმარება“, – აღნიშნა ზელენსკიმ.
გარდა ამისა, უკრაინის პრეზიდენტის თქმით, გერმანიის კანცლერს, ოლაფ შოლცსაც შეხვდა, რომელსაც მადლობა გადაუხადა ქვეყნისთვის მიწოდებული საჰაერო თავდაცვის სისტემებისთვის. ლიდერებმა ისაუბრეს შემდგომი თანამშრომლობის საკითხებზეც უსაფრთხოების სფეროში.
