საქართველოსგან რასაც ველოდებით, პოლარიზაციის გადალახვის უნარია, რადგან ის ნებისმიერი ტიპის პროგრესისთვის შემაფერხებელია, – ამის შესახებ ევროპარლამენტარმა ნაჩო სანჩეს ამორმა განაცხადა.
მისი თქმით, ევროკომისიის პრეზიდენტის დღევანდელ გამოსვლაში შენიშნა, რომ საქართველო იმავე დონზე განიხილება, როგორც უკრაინა და მოლდოვა.
„რაც შევნიშნე დღეს მისის ფონ დერ ლაიენის გამოსვლაში, შემდეგია, რომ საქართველო იმავე დონეზე განიხილება, როგორც უკრაინა და მოლდოვა. ვფიქრობ, ეს კარგი სიახლეა. ხანდახან ჩვენ საქართველოში პოლიტიკურ ცხოვრებას ვაფასებდით, როგორც მთავრობასა და ოპოზიციურ პარტიებს შორის უამრავი წვრილმანი დავის გამო ყურადღების გამფანტველად. ის, რასაც ვურჩევდით ნებისმიერ პოლიტიკურ ძალას ქვეყანაში, ერთად დასხდომა და იმ დღის წესრიგზე საუბარია, რომელიც ევროპული მისწრაფების ვალდებულებებს ეხება. ეს რეკომენდაცია ეხება როგორც მთავრობას, ისე ოპოზიციას, ნებისმიერ პოლიტიკურ პარტიას და სამოქალაქო საზოგადოებას. რასაც ველოდებით საქართველოსგან, როგორც ქვეყნისგან და საზოგადოებისგან, პოლარიზაციის გადალახვის უნარია, რადგან ის ნებისმიერი ტიპის პროგრესისთვის შემაფერხებელია“, – განაცხადა ნაჩო სანჩეს ამორმა.
