ჟიგიმანტასი, რომ ცნობილი გიჟიმანტასია, ეს უკვე ვიცით მისი გამოსვლებით და მსჯელობით. ჩვენთან კი არა, უკვე თავიანთ ქვეყანაშიც იციან და ამიტომაც ჩამოაქვეითეს, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.
მისივე თქმით, მიხეილ სააკაშვილს კონკრეტული ბრალი აქვს დამტკიცებული და ის სასჯელს ბოლომდე მოიხდის.
ირაკლი ზარქუამ კომენტარი გააკეთა ლიეტუვის პარლამენტის წევრის, ჟიგიმანტას პავილიონის განცხადებაზე, სადაც პავილიონისი ამბობს: „სააკაშვილი პატიმრობაშია, მიუხედავად მისი სიცოცხლის მზარდი საფრთხისა და ყველა საერთაშორისო ძალისხმევისა, რათა უზრუნველყოს მისი გათავისუფლება. ერთი წლის წინ, როცა ერთ-ერთმა პირველმა შევამჩნიე საქართველოს მმართველების მზარდი ავტორიტარიზმი, ბევრმა ბრალი წარმიდგინა – ოფიციალურმა თბილისმა ეს უმაღლეს დონეზე გააკეთა“.
როგორც ზარქუა ამბობს, ჟიგიმანტას პავილიონისი „ნაციონალური მოძრაობის“ ლაქია გახდა.
„მნიშვნელოვანი კომიტეტის თავმჯდომარე იყო. ასეთი არაადეკვატური გამოხტომებისა და განცხადებების გამო ჩამოაქვეითეს და გახდა „ნაციონალური მოძრაობის“ ჩვეულებრივი ლაქია. რატომ გახდა, ეს უნდა ვეძებოთ ძველ წარსულში, რა ურთიერთობები ჰქონდა სააკაშვილის მთავრობას მასთან და რითი ჰყავთ გამოჭერილი ეს კაცი, რომ ასეთ თემებზე ალაპარაკებენ, თუმცა ეს მისი უფლებაა. ჩვენ ყურადღება არ უნდა მივაქციოთ, გიჟიმანტასები უამრავი გამოჩნდება. ერთია მთავარი, ჩვენ ვიცავთ საერთაშორისო და საქართველოს კანონმდებლობას, რომლის მიხედვითაც კონკრეტული ბრალი აქვს წარდგენილი და დამტკიცებული პატიმარ სააკაშვილს. შესაბამისად, ის სასჯელს ბოლომდე მოიხდის“, – განაცხადა ირაკლი ზარქუამ.
