როგორც კი თქვენ ფეხი აითრიეთ, თქვენგან განსხვავებით შსს მინისტრმა [ვახტანგ გომელაურმა] ფეხი არ აითრია, გადავიდა ქმედებაზე, თქვენ ეს არ მოგეწონათ და გადადექით , - ასე მიმართა პარლამენტის დროებითი საგამოძიებო კომისიის სხდომაზე, კომისიის თავმჯდომარე თეა წულუკიანმა ყოფილ პრემიერ-მინისტრს გიორგი გახარიას „ნაციონალური მოძრაობის“ ყოფილი თავმჯდომარის, ნიკა მელიას დაკავებაზე საუბრისას.
გიორგი გახარიამ თეა წულუკიანის საპასუხოდ განაცხადა, რომ „გაანებეთ ვახოს თავი, ნუ რევთ ვახოს საქმეში“.
ამასთან, გახარიას საპასუხოდ თეა წულუკიანმა განაცხადა: „თქვენ მე მგონი, წითელი ჯვარი ხართ თუ ყოფილი შსს მინისტრი არ ვიცი. ხან დეპუტატებს ყავას უსხამდით იმის მაგივრად, რომ შტურმი მოგეგერიებინათ უფრო მაღალკვალიფიციურად, ხან ჩემზე და ვიღაცებზე ზრუნავდით და ბრიფინგზე ტყუილებს ამბობდით, რომ მელიას დაკავება პოლარიზაციაა გამოიწვევს, ხოლო ახლა აღმოჩნდა, რომ ბიძინა ივანიშვილის ბრალია თქვენი წასვლა“.
თეა წულუკიანის კითხვაზე, ურჩიეს თუ არა უცხოელმა ელჩებმა, რომ არ დაეკავებინა ნიკა მელია და წასულიყო ოპოზიციაში, გიორგი გახარია პასუხობს, რომ ოპოზიციაში „ბიძინა ივანიშვილმა გაიყვანა“.
„მკაფიოდ გეუბნებით, ოპოზიციაში გამიყვანა ბიძინა ივანიშვილმა, რომელმაც ყველა შეთანხმება დაარღვია. ამიტომ მოხდა ის, რაც მოხდა. ახლა თქვენ გადაწყვიტეთ, ამ თემაში უფრო ღრმად შესვლა გინდათ თუ არ გინდათ. თუ გინდათ, მე პრობლემა არ მაქვს, მოგყვებით ბოლომდე“, - განაცხადა გიორგი გახარიამ.
ამასთან, როგორც გახარიას განცხადების საპასუხოდ წულუკიანმა განაცხადა, „რა მომენტშიც გადადექით, იქ დამთავრდა თქვენი პოლიტიკური კარიერა“.
„რას იმუქრებით, არსად არ გაქვთ შესასვლელი და გინდა შედით და გინდა გამოდით, არც აქანე მიგიღებენ, არც იქანე მიგიღებენ, ასეა თქვენი საქმე დღეს. თქვენზე მე აღარ ვღელავ, რა მომენტშიც გადადექით, იქ დამთავრდა თქვენი პოლიტიკური კარიერა“, - განაცხადა თეა წულუკიანმა.
