გერმანიის კანცლერი, ოლაფ შოლცი აცხადებს, რომ უკრაინას ხელი არ უნდა შეეშალოს მის გადაწყვეტილებაში იყოს დემოკრატიული, სუვერენული ერი ევროპისკენ მიმავალ გზაზე.
Reuters-ის ინფორმაციით, საზოგადოებრივ მაუწყებელ ARD-თან ინტერვიუში კითხვაზე, იზიარებს თუ არა აშშ-ის პრეზიდენტის, დონალდ ტრამპის მოსაზრებას, რომ რუსეთ-უკრაინის ომის დაწყებაში დამნაშავე უკრაინაა, შოლცმა უპასუხა: „ეს ასე არ არის. ჩვენ ევროპაში დაჟინებით ვამტკიცებთ ამას".
მისი თქმით, ევროკავშირი უკრაინისთვის, როგორც პოტენციური წევრისთვის, კარს ღიას ტოვებს.
„უკრაინას ხელი არ უნდა შეეშალოს მის გადაწყვეტილებაში იყოს დემოკრატიული, სუვერენული ერი ევროპისკენ მიმავალ გზაზე“, - აღნიშნა შოლცმა.
მისივე თქმით, კონფლიქტის მშვიდობიანად მოგვარების შემთხვევაშიც, უკრაინას უნდა ჰყავდეს ძლიერი არმია.
„ამისთვის ჩვენ, ევროპაში და ჩვენი საერთაშორისო და ტრანსატლანტიკური პარტნიორები ვიზიარებთ პასუხისმგებლობას“, - დასძინა შოლცმა.
