შეერთებული შტატების სახელმწიფო დეპარტამენტის განცხადებით, მათ სამთავრობო გემებს პანამის არხის გავლით გადასახადის გადახდის გარეშე გაცურვის უფლება მიეცემათ, - ინფორმაციას სააგენტო „ფრანს-პრესი“ აშშ-ის სახელმწიფო დეპარტამენტზე დაყრდნობით ავრცელებს.
„შეერთებული შტატების სამთავრობო გემებს ახლა შეუძლიათ პანამის არხის ტრანზიტით გავლა გადასახადის გარეშე, რაც დაზოგავს აშშ-ის მთავრობას მილიონობით აშშ დოლარს წელიწადში“, - ნათქვამია სახელმწიფო დეპარტამენტის განცხადებაში.
მანამდე, აშშ-ის სახელმწიფო მდივანმა, მარკო რუბიომ განაცხადა, რომ კვირას გამართული მოლაპარაკებების დროს პანამამ შეერთებულ შტატებს დათმობები შესთავაზა. მისი თქმით, პანამის ხელმძღვანელობას განუცხადა, რომ უსამართლობაა, როცა შეერთებული შტატები სასიცოცხლო მნიშვნელობის არხს იცავს და ამავდროულად, მისი გამოყენებისთვის გადასახადი ეკისრება.
თავის მხრივ
პანამის არხის ადმინისტრაცია აშშ-ის სამთავრობო გემებისთვის არხში გადასახადის გარეშე გავლის შესახებ გავრცელებულ ინფორმაციას უარყოფს, - ამის შესახებ ინფორმაციას სააგენტო Reuters-ი პანამის არხის ადმინისტრაციის მიერ გავრცელებულ განცხადებაზე დაყრდნობით ავრცელებს.
„პანამის არხის ადმინისტრაცია, რომელსაც არხში გავლისთვის გადასახადების დაწესების უფლებამოსილება აქვს, იტყობინება, რომ მათში ცვლილებები არ შეუტანია“, - აცხადებს პანამის არხის ადმინისტრაცია.
პანამის არხის ადმინისტრაცია, აშშ-ის სახელმწიფო დეპარტამენტის განცხადებას გამოეხმაურა, რომლის თანახმადაც, ამერიკული სამთავრობო გემები პანამის არხში გავლას გადასახადის გადახდის გარეშე შეძლებენ.
„პანამის არხის ადმინისტრაცია მზად არის აშშ-ის სამხედრო გემების ტრანზიტთან დაკავშირებით შესაბამის ამერიკელ ოფიციალურ პირებთან დიალოგი დაამყაროს“, - აღნიშნულია განცხადებაში.
