საფრანგეთის მთავრობა უკრაინისთვის „ლეკლერკის“ ტიპის ტანკების გადაცემის საკითხზე მუშაობს.
„რაც შეეხება „ლეკლერკებს“, შეიარაღებული ძალების მინისტრს ვთხოვე, იმუშაოს ამ საკითხზე. არაფერია გამორიცხული და ეს ნამდვილად ფასდება კოლექტიურად. გადაწყვეტილება სამი კრიტერიუმის საფუძველზე მიიღება. პირველი, რომ ეს არ არის ესკალაცია, მეორე, რომ მას შეუძლია, რეალური და ეფექტური მხარდაჭერა გაუწიოს უკრაინას და მესამე, რომ ის არ ასუსტებს ჩვენი თავდაცვის შესაძლებლობებს“, – განაცხადა საფრანგეთის პრეზიდენტმა ემანუელ მაკრონმა.
ამასთან, უკრაინული მედიის ინფორმაციით, ამ თვის დასაწყისში საფრანგეთმა, გერმანიამ და აშშ-მა უკრაინისთვის ფრანგული „აემექს-10“ მსუბუქი ტანკების, გერმანული ქვეითთა საბრძოლო მანქანა „მარდერების“ და ამერიკული საბრძოლო მანქანა „ბრედლის“ გადაცემის პირობა დადეს.
